| |
Wycliffe |   | |
 |
| |
| | Hbr 3:1 | Therfor, hooli britheren, and parceneris of heuenli cleping, biholde ye the apostle and the bischop of oure confessioun, Jhesu,
| |
| | Hbr 3:2 | which is trewe to hym that made hym, as also Moises in al the hous of hym.
| |
| | Hbr 3:3 | But this byschop is had worthi of more glorie than Moises, bi as myche as he hath more honour of the hous, that made the hous.
| |
| | Hbr 3:4 | For ech hous is maad of sum man; he that made alle thingis of nouyt is God.
| |
| | Hbr 3:5 | And Moises was trewe in al his hous, as a seruaunt, in to witnessyng of tho thingis that weren to be seid;
| |
| | Hbr 3:6 | but Crist as a sone in his hous. Which hous we ben, if we holden sad trist and glorie of hope in to the ende.
| |
| | Hbr 3:7 | Wherfor as the Hooli Goost seith, To dai, if ye han herd his vois, nyle ye hardne youre hertis,
| |
| | Hbr 3:8 | as in wraththing, lijk the dai of temptacioun in desert;
| |
| | Hbr 3:9 | where youre fadris temptiden me, and preueden, and siyen my werkis fourti yeeris.
| |
| | Hbr 3:10 | Wherfor Y was wrooth to this generacioun, and Y seide, Euere more thei erren in herte, for thei knewen not my weies;
| |
| | Hbr 3:11 | to whiche Y swore in my wraththe, thei schulen not entre in to my reste.
| |
| | Hbr 3:12 | Britheren, se ye, lest perauenture in ony of you be an yuel herte of vnbileue, to departe fro the lyuynge God.
| |
| | Hbr 3:13 | But moneste you silf bi alle daies, the while to dai is named, that noon of you be hardned bi fallas of synne.
| |
| | Hbr 3:14 | For we ben maad parceneris of Crist, if netheles we holden the bigynnyng of his substaunce sad in to the ende.
| |
| | Hbr 3:15 | While it is seid, to dai, if ye han herd the vois of hym, nyle ye hardne youre hertis, as in that wraththing.
| |
| | Hbr 3:16 | For summen heringe wraththiden, but not alle thei that wenten out of Egipt bi Moises.
| |
| | Hbr 3:17 | But to whiche was he wraththid fourti yeeris? Whether not to hem that synneden, whos careyns weren cast doun in desert?
| |
| | Hbr 3:18 | And to whiche swoor he, that thei schulden not entre in to the reste of hym, not but to hem that weren vnbileueful?
| |
| | Hbr 3:19 | And we seen, that thei myyten not entre in to the reste of hym for vnbileue.
| |
