| |
Wycliffe |   | |
 |
| |
| | Hbr 13:1 | The charite of britherhod dwelle in you, and nyle ye foryete hospitalite;
| |
| | Hbr 13:2 | for bi this summen plesiden to aungels, that weren resseyued to herborewe.
| |
| | Hbr 13:3 | Thenke ye on boundun men, as ye weren togidere boundun, and of trauelinge men, as ye silf dwellinge in the body.
| |
| | Hbr 13:4 | `Wedding is in alle thingis onourable, and bed vnwemmed; for God schal deme fornicatouris and auouteris.
| |
| | Hbr 13:5 | Be youre maneres withoute coueitise, apaied with present thingis; for he seide, Y schal not leeue thee,
| |
| | Hbr 13:6 | nether forsake, so that we seie tristily, The Lord is an helpere to me; Y schal not drede, what a man schal do to me.
| |
| | Hbr 13:7 | Haue ye mynde of youre souereyns, that han spokun to you the word of God; of whiche `biholde ye the goyng out of lyuynge, and sue ye the feith of hem,
| |
| | Hbr 13:8 | Jhesu Crist, yistirdai, and to dai, he is also into worldis.
| |
| | Hbr 13:9 | Nyle ye be led awei with dyuerse `techingis, and straunge. For it is best to stable the herte with grace, not with metis, whiche profitiden not to men wandringe in hem.
| |
| | Hbr 13:10 | We han an auter, of which thei that seruen to the tabernacle, han not power to ete.
| |
| | Hbr 13:11 | For of whiche beestis the blood is borun in for synne in to hooli thingis bi the bischop, the bodies of hem ben brent with out the castels.
| |
| | Hbr 13:12 | For which thing Jhesu, that he schulde halewe the puple bi his blood, suffride with out the gate.
| |
| | Hbr 13:13 | Therfor go we out to hym with out the castels, berynge his repreef.
| |
| | Hbr 13:14 | For we han not here a citee dwellynge, but we seken a citee to comynge.
| |
| | Hbr 13:15 | Therfor bi hym offre we a sacrifice of heriyng euere more to God, that is to seye, the fruyt of lippis knoulechinge to his name.
| |
| | Hbr 13:16 | And nyle ye foryete wel doynge, and comynyng; for bi siche sacrifices God is disserued.
| |
| | Hbr 13:17 | Obeie ye to youre souereyns, and be ye suget to hem; for thei perfitli waken, as to yeldinge resoun for youre soulis, that thei do this thing with ioie, and not sorewinge; for this thing spedith not to you.
| |
| | Hbr 13:18 | Preie ye for vs, and we tristen that we han good conscience in alle thingis, willynge to lyue wel.
| |
| | Hbr 13:19 | More ouer Y biseche you to do, that Y be restorid the sunnere to you.
| |
| | Hbr 13:20 | And God of pees, that ladde out fro deth the greet scheepherd of scheep, in the blood of euerlastinge testament, oure Lord Jhesu Crist,
| |
| | Hbr 13:21 | schape you in al good thing, that ye do the wille of hym; and he do in you that thing that schal plese bifor hym, bi Jhesu Crist, to whom be glorie in to worldis of worldis. Amen.
| |
| | Hbr 13:22 | And, britheren, Y preie you, that ye suffre a word of solace; for bi ful fewe thingis Y haue writun to you.
| |
| | Hbr 13:23 | Knowe ye oure brother Tymothe, that is sent forth, with whom if he schal come more hastili, Y schal se you.
| |
| | Hbr 13:24 | Grete ye wel alle youre souereyns, and alle hooli men. The britheren of Italie greten you wel.
| |
| | Hbr 13:25 | The grace of God be with you alle. Amen.
| |
