| |
Wycliffe |   | |
 |
| |
| | Tts 3:1 | Amoneste hem to be sugetis to prynces, and to poweris; to obeische to that that is seid, and to be redi to al good werk;
| |
| | Tts 3:2 | to blasfeme no man, to be not ful of chiding, but temperat, schewynge al myldenesse to alle men.
| |
| | Tts 3:3 | For we weren sum tyme vnwise, vnbileueful, errynge, and seruynge to desiris, and to dyuerse lustis, doynge in malice and enuye, worthi to be hatid, hatinge ech othere.
| |
| | Tts 3:4 | But whanne the benygnyte and the manhed of oure sauyour God aperide,
| |
| | Tts 3:5 | not of werkis of riytwisnesse that we diden, but bi his merci he made vs saaf, bi waischyng of ayen bigetyng, and ayen newyng of the Hooli Goost,
| |
| | Tts 3:6 | whom he schedde into vs plenteuousli bi Jhesu Crist,
| |
| | Tts 3:7 | oure saueour, that we iustified bi his grace, ben eiris by hope of euerlastinge lijf.
| |
| | Tts 3:8 | A trewe word is, and of these thingis Y wole that thou conferme othere, that thei that bileuen to God, be bisy to be aboue othere in good werkis. These thingis ben good, and profitable to men.
| |
| | Tts 3:9 | And eschewe thou foltische questiouns, and genologies, and stryues, and fiytyngis of the lawe; for tho ben vnprofitable and veyn.
| |
| | Tts 3:10 | Eschewe thou a man eretik, aftir oon and the secound correccioun;
| |
| | Tts 3:11 | witinge that he that is siche a maner man is subuertid, and trespassith, and is dampned bi his owne dom.
| |
| | Tts 3:12 | Whanne Y sende to thee Arteman, or Titicus, hiy thou to `come to me to Nycopolis; for Y haue purposid to dwelle in wyntir there.
| |
| | Tts 3:13 | Bisili byfor sende Zenam, a wise man of lawe, and Apollo, that no thing faile to hem.
| |
| | Tts 3:14 | Thei that ben of ouris, lerne to be gouernouris in good werkis, to necessarie vsis, that thei be not with out fruyt.
| |
| | Tts 3:15 | Alle men that ben with me greeten thee wel. Grete thou wel hem, that louen vs in feith. The grace of God be with you alle. Amen.
| |
