| |
Wycliffe |   | |
 |
| |
| | 2Ti 4:1 | I witnesse bifore God and Crist Jhesu, that schal deme the quike and the deed, and bi the comyng of hym, and the kyngdom of hym,
| |
| | 2Ti 4:2 | preche the word, be thou bisi couenabli with outen rest, repreue thou, biseche thou, blame thou in al pacience and doctryn.
| |
| | 2Ti 4:3 | For tyme schal be, whanne men schulen not suffre hoolsum teching, but at her desiris thei schulen gadere `togidere to hem silf maistris yitchinge to the eeris.
| |
| | 2Ti 4:4 | And treuli thei schulen turne awei the heryng fro treuthe, but to fablis thei schulen turne.
| |
| | 2Ti 4:5 | But wake thou, in alle thingis traueile thou, do the werk of an euangelist, fulfille thi seruyce, be thou sobre.
| |
| | 2Ti 4:6 | For Y am sacrifisid now, and the tyme of my departyng is nyy.
| |
| | 2Ti 4:7 | Y haue stryuun a good strijf, Y haue endid the cours, Y haue kept the feith.
| |
| | 2Ti 4:8 | In `the tothir tyme a coroun of riytwisnesse is kept to me, which the Lord, a iust domesman, schal yelde to me in that dai; and not oneli to me, but also to these that louen his comyng.
| |
| | 2Ti 4:9 | Hyye thou to come to me soone. For Demas, louynge this world, hath forsakun me, and wente to Tessalonyk,
| |
| | 2Ti 4:10 | Crescens in to Galathi, Tite in to Dalmacie;
| |
| | 2Ti 4:11 | Luk aloone is with me. Take thou Mark, and brynge with thee; for he is profitable to me in to seruyce.
| |
| | 2Ti 4:12 | Forsothe Y sente Titicus to Effesi.
| |
| | 2Ti 4:13 | The cloth which Y lefte at Troade at Carpe, whanne thou comest, bringe with thee, and the bookis, but moost parchemyne.
| |
| | 2Ti 4:14 | Alisaundre, the tresorer, schewide to me myche yuele; `the Lord schal yelde to hym aftir his werkis.
| |
| | 2Ti 4:15 | Whom also thou eschewe; for he ayenstood ful greetli oure wordis.
| |
| | 2Ti 4:16 | In my firste defence no man helpide me, but alle forsoken me; be it not arettid to hem.
| |
| | 2Ti 4:17 | But the Lord helpide me, and coumfortide me, that the preching be fillid bi me, and that alle folkis here, that Y am delyueride fro the mouth of the lioun.
| |
| | 2Ti 4:18 | And the Lord delyueride me fro al yuel werk, and schal make me saaf in to his heuenly kingdom, to whom be glorie in to worldis of worldis.
| |
| | 2Ti 4:19 | Amen. Grete wel Prisca, and Aquila, and the hous of Oneseforus.
| |
| | 2Ti 4:20 | Erastus lefte at Corynthi, and Y lefte Trofymus sijk at Mylete.
| |
| | 2Ti 4:21 | Hiye thou to come bifore wyntir. Eubolus, and Prudent, and Lynus, and Claudia, and alle britheren, greten thee wel.
| |
| | 2Ti 4:22 | Oure Lord Jhesu Crist be with thi spirit. The grace of God be with you. Amen.
| |
