| |
Wycliffe |   | |
 |
| |
| | 2Ti 2:1 | Therfor thou, my sone, be coumfortid in grace that is in Crist Jhesu.
| |
| | 2Ti 2:2 | And what thingis thou hast herd of me bi many witnessis, bitake thou these to feithful men, whiche schulen `be also able to teche othere men.
| |
| | 2Ti 2:3 | Trauele thou as a good knyyt of Crist Jhesu.
| |
| | 2Ti 2:4 | No man holdinge knyythod to God, wlappith hym silf with worldli nedis, that he plese to hym, to whom he hath preuyd hym silf.
| |
| | 2Ti 2:5 | For he that fiytith in a batel, schal not be corowned, but he fiyte lawfuli.
| |
| | 2Ti 2:6 | It bihoueth an erthetiliere to resseyue first of the fruytis.
| |
| | 2Ti 2:7 | Vndurstonde thou what thingis Y seie. For the Lord schal yyue to thee vndurstonding in alle thingis.
| |
| | 2Ti 2:8 | Be thou myndeful that the Lord Jhesu Crist of the seed of Dauid hath rise ayen fro deth,
| |
| | 2Ti 2:9 | aftir my gospel, in which Y trauele `til to boondis, as worching yuele, but the word of God is not boundun.
| |
| | 2Ti 2:10 | Therfor Y suffre alle thingis for the chosun, that also thei gete the heelthe, that is in Crist Jhesu, with heuenli glorie.
| |
| | 2Ti 2:11 | A trewe word, that if we ben deed togidere, also we schulen liue togidere;
| |
| | 2Ti 2:12 | if we suffren, we schulen regne togidere; if we denyen, he schal denye vs;
| |
| | 2Ti 2:13 | if we bileuen not, he dwellith feithful, he mai not denye hym silf.
| |
| | 2Ti 2:14 | Teche thou these thingis, witnessinge bifore God. Nyle thou stryue in wordis; for to no thing it is profitable, but to the subuerting of men that heren.
| |
| | 2Ti 2:15 | Bisili kepe to yyue thi silf a preued preisable werkman to God, with oute schame, riytli tretinge the word of treuthe.
| |
| | 2Ti 2:16 | But eschewe thou vnhooli and veyn spechis, for whi tho profiten myche to vnfeithfulnesse,
| |
| | 2Ti 2:17 | and the word of hem crepith as a canker. Of whiche Filete is, and Ymeneus,
| |
| | 2Ti 2:18 | whiche felden doun fro the treuthe, seiynge that the rising ayen is now doon, and thei subuertiden the feith of summen.
| |
| | 2Ti 2:19 | But the sad foundement of God stondith, hauynge this marke, The Lord knowith whiche ben hise, and, Ech man that nameth the name of the Lord, departith fro wickidnesse.
| |
| | 2Ti 2:20 | But in a greet hous ben not oneli vessels of gold and of siluer, but also of tree and of erthe; and so summen ben in to onour, and summe in to dispit.
| |
| | 2Ti 2:21 | Therfor if ony man clensith hym silf fro these, he schal be a vessel halewid in to onour, and profitable to the Lord, redi to al good werk.
| |
| | 2Ti 2:22 | And fle thou desiris of yongthe, but sue thou riytwisnesse, feith, charite, pees, with hem that inwardli clepen the Lord of a clene herte.
| |
| | 2Ti 2:23 | And eschewe thou foltische questiouns, and without kunnyng, wytynge that tho gendren chidyngis.
| |
| | 2Ti 2:24 | But it bihoueth the seruaunt of the Lord to chide not; but to be mylde to alle men, able to teche,
| |
| | 2Ti 2:25 | paciente, with temperaunce repreuynge hem that ayenstonden the treuthe, that sum tyme God yyue to hem forthenkyng, that thei knowen the treuthe,
| |
| | 2Ti 2:26 | and that thei rise ayen fro the snares of the deuel, of whom thei ben holdun prisoneris at his wille.
| |
