| |
Wycliffe |   | |
 |
| |
| | Phl 2:1 | Therfor if ony coumfort is in Crist, if ony solace of charite, if ony felouschipe of spirit, if ony inwardnesse of merci doyng,
| |
| | Phl 2:2 | fille ye my ioye, that ye vndurstonde the same thing, and haue the same charite, of o wille, and feelen the same thing;
| |
| | Phl 2:3 | no thing bi strijf, nether by veyn glorie, but in mekenesse, demynge eche othere to be heiyer than hym silf;
| |
| | Phl 2:4 | not biholdinge ech bi hym silf what thingis ben his owne, but tho thingis that ben of othere men.
| |
| | Phl 2:5 | And fele ye this thing in you, which also in Crist Jhesu;
| |
| | Phl 2:6 | that whanne he was in the forme of God, demyde not raueyn, that hym silf were euene to God;
| |
| | Phl 2:7 | but he lowide hym silf, takinge the forme of a seruaunt, and was maad in to the licknesse of men, and in abite was foundun as a man.
| |
| | Phl 2:8 | He mekide hym silf, and was maad obedient to the deth, yhe, to the deth of the cross.
| |
| | Phl 2:9 | For which thing God enhaunside hym, and yaf to hym a name that is aboue al name;
| |
| | Phl 2:10 | that in the name of Jhesu ech kne be bowid, of heuenli thingis, of ertheli thingis, and of hellis;
| |
| | Phl 2:11 | and ech tunge knouleche, that the Lord Jhesu Crist is in the glorie of God the fadir.
| |
| | Phl 2:12 | Therfor, my most dereworthe britheren, as euere more ye han obeischid, not in my presence onely, but myche more now in myn absence, worche ye with drede and trembling youre heelthe.
| |
| | Phl 2:13 | For it is God that worchith in you, bothe to wilne, and to performe, for good wille.
| |
| | Phl 2:14 | And do ye alle thingis with out grutchingis and doutyngis;
| |
| | Phl 2:15 | that ye be with out playnt, and symple as the sones of God, with out repreef, in the myddil of a schrewid nacioun and a weiward; among whiche ye schynen as yyueris of liyt in the world.
| |
| | Phl 2:16 | And holde ye togidere the word of lijf to my glorie in the day of Crist; for Y haue not runnen in veyn, nether Y haue trauelid in veyn.
| |
| | Phl 2:17 | But thouy Y be offrid or slayn on the sacrifice and seruyce of youre feith, Y haue ioye, and Y thanke you alle.
| |
| | Phl 2:18 | And the same thing haue ye ioye, and thanke ye me.
| |
| | Phl 2:19 | And Y hope in the Lord Jhesu, that Y schal sende Tymothe soone to you, that Y be of good coumfort, whanne tho thingis ben knowun that ben aboute you.
| |
| | Phl 2:20 | For Y haue no man so of o wille, that is bisi for you with clene affeccioun.
| |
| | Phl 2:21 | For alle men seken tho thingis that ben her owne, not tho that ben of Crist Jhesu.
| |
| | Phl 2:22 | But knowe ye the asaie of hym, for as a sone to the fadir he hath seruyd with me in the gospel.
| |
| | Phl 2:23 | Therfor Y hope that Y schal sende hym to you, anoon as Y se what thingis ben aboute me.
| |
| | Phl 2:24 | And Y triste in the Lord, that also my silf schal come to you soone.
| |
| | Phl 2:25 | And Y gesside it nedeful to sende to you Epafrodite, my brother and euene worchere, and myn euene knyyt, but youre apostle, and the mynystre of my nede.
| |
| | Phl 2:26 | For he desiride you alle, and he was sorewful, therfor that ye herden that he was sijk.
| |
| | Phl 2:27 | For he was sijk to the deth, but God hadde merci on him; and not oneli on hym, but also on me, lest Y hadde heuynesse on heuynesse.
| |
| | Phl 2:28 | Therfor more hastili Y sente hym, that whanne ye han seyn hym, ye haue ioye eft, and Y be withouten heuynesse.
| |
| | Phl 2:29 | Therfor resseyue ye hym with al ioye in the Lord, and haue ye suche with al onour.
| |
| | Phl 2:30 | For the werk of Crist he wente to deth, yyuynge his lijf, that he schulde fulfille that that failide of you anentis my seruyce.
| |
