| |
Wycliffe |   | |
 |
| |
| | Eph 5:1 | Therfor be ye foloweris of God, as moost dereworthe sones;
| |
| | Eph 5:2 | and walke ye in loue, as Crist louyde vs, and yaf hym silf for vs an offryng and a sacrifice to God, in to the odour of swetnesse.
| |
| | Eph 5:3 | And fornycacioun, and al vnclennesse, or aueryce, be not named among you, as it bicometh holi men;
| |
| | Eph 5:4 | ethir filthe, or foli speche, or harlatrye, that perteyneth not to profit, but more doyng of thankyngis.
| |
| | Eph 5:5 | For wite ye this, and vndurstonde, that ech letchour, or vnclene man, or coueytouse, that serueth to mawmetis, hath not eritage in the kingdom of Crist and of God.
| |
| | Eph 5:6 | No man disseyue you bi veyn wordis; for whi for these thingis the wraththe of God cam on the sones of vnbileue.
| |
| | Eph 5:7 | Therfor nyle ye be maad parteneris of hem.
| |
| | Eph 5:8 | For ye weren sum tyme derknessis, but now `ye ben liyt in the Lord. Walke ye as the sones of liyt.
| |
| | Eph 5:9 | For the fruyt of liyt is in al goodnesse, and riytwisnesse, and treuthe.
| |
| | Eph 5:10 | And preue ye what `thing is wel plesynge to God.
| |
| | Eph 5:11 | And nyle ye comyne to vnfruytouse werkis of derknessis; but more repreue ye.
| |
| | Eph 5:12 | For what thingis ben don of hem in priuy, it is foule, yhe, to speke.
| |
| | Eph 5:13 | And alle thingis that ben repreuyd of the liyt, ben opynli schewid; for al thing that is schewid, is liyt.
| |
| | Eph 5:14 | For which thing he seith, Rise thou that slepist, and rise vp fro deth, and Crist schal liytne thee.
| |
| | Eph 5:15 | Therfor, britheren, se ye, hou warli ye schulen go;
| |
| | Eph 5:16 | not as vnwise men, but as wise men, ayenbiynge tyme, for the daies ben yuele.
| |
| | Eph 5:17 | Therfor nyle ye be maad vnwise, but vndurstondynge which is the wille of God.
| |
| | Eph 5:18 | And nyle ye be drunkun of wyn, in which is letcherie, but be ye fillid with the Hooli Goost; and speke ye to you silf in salmes,
| |
| | Eph 5:19 | and ymnes, and spiritual songis, syngynge and seiynge salm in youre hertis to the Lord;
| |
| | Eph 5:20 | euermore doynge thankingis for alle thingis in the name of oure Lord Jhesu Crist to God and to the fadir.
| |
| | Eph 5:21 | Be ye suget togidere in the drede of Crist.
| |
| | Eph 5:22 | Wymmen, be thei suget to her hosebondis,
| |
| | Eph 5:23 | as to the Lord, for the man is heed of the wymman, as Crist is heed of the chirche; he is sauyour of his bodi.
| |
| | Eph 5:24 | But as the chirche is suget to Crist, so wymmen to her hosebondis in alle thingis.
| |
| | Eph 5:25 | Men, loue ye youre wyues, as Crist louyde the chirche, and yaf hym silf for it, to make it holi;
| |
| | Eph 5:26 | and clenside it with the waisching of watir, in the word of lijf,
| |
| | Eph 5:27 | to yyue the chirche gloriouse to hym silf, that it hadde no wem, ne ryueling, or ony siche thing, but that it be hooli and vndefoulid.
| |
| | Eph 5:28 | So and men `schulen loue her wyues, as her owne bodies. He that loueth his wijf, loueth hym silf;
| |
| | Eph 5:29 | for no man hatide euere his owne fleisch, but nurischith and fostrith it, as Crist doith the chirche.
| |
| | Eph 5:30 | And we ben membris of his bodi, of his fleisch, and of his boonys.
| |
| | Eph 5:31 | For this thing a man schal forsake his fadir and modir, and he schal drawe to his wijf; and thei schulen be tweyne in o fleisch.
| |
| | Eph 5:32 | This sacrament is greet; yhe, Y seie in Crist, and in the chirche.
| |
| | Eph 5:33 | Netheles ye alle, ech man loue his wijf as hym silf; and the wijf drede hir hosebonde.
| |
