| |
Wycliffe |   | |
 |
| |
| | Eph 3:1 | For the grace of this thing I Poul, the boundun of Crist Jhesu, for you hethene men,
| |
| | Eph 3:2 | if netheles ye han herd the dispensacioun of Goddis grace, that is youun to me in you.
| |
| | Eph 3:3 | For bi reuelacioun the sacrament is maad knowun to me, as Y aboue wroot in schort thing,
| |
| | Eph 3:4 | as ye moun rede, and vndurstonde my prudence in the mysterie of Crist.
| |
| | Eph 3:5 | Which was not knowun to othere generaciouns to the sones of men, as it is now schewid to his hooli apostlis and prophetis in the spirit,
| |
| | Eph 3:6 | that hethene men ben euen eiris, and of oo bodi, and parteneris togidere of his biheest in Crist Jhesu bi the euangelie;
| |
| | Eph 3:7 | whos mynystre Y am maad, bi the yifte of Goddis grace, which is youun to me bi the worchyng of his vertu.
| |
| | Eph 3:8 | To me, leeste of alle seyntis, this grace is youun to preche among hethene men the vnserchable richessis of Crist, and to liytne alle men,
| |
| | Eph 3:9 | which is the dispensacioun of sacrament hid fro worldis in God, that made alle thingis of nouyt;
| |
| | Eph 3:10 | that the myche fold wisdom of God be knowun to princis and potestatis in heuenli thingis bi the chirche,
| |
| | Eph 3:11 | bi the bifore ordinaunce of worldis, which he made in Crist Jhesu oure Lord.
| |
| | Eph 3:12 | In whom we han trist and nyy comyng, in tristenyng bi the feith of hym.
| |
| | Eph 3:13 | For which thing Y axe, that ye faile not in my tribulaciouns for you, which is youre glorie.
| |
| | Eph 3:14 | For grace of this thing Y bowe my knees to the fadir of oure Lord Jhesu Crist,
| |
| | Eph 3:15 | of whom ech fadirhod in heuenes and in erthe is named,
| |
| | Eph 3:16 | that he yyue to you, aftir the richessis of his glorie, vertu to be strengthid bi his spirit in the ynnere man,
| |
| | Eph 3:17 | that Crist dwelle bi feith in youre hertis; that ye rootid and groundid in charite,
| |
| | Eph 3:18 | moun comprehende with alle seyntis, which is the breede, and the lengthe, and the hiynesse, and the depnesse;
| |
| | Eph 3:19 | also to wite the charite of Crist more excellent than science, that ye be fillid in al the plentee of God.
| |
| | Eph 3:20 | And to hym that is myyti to do alle thingis more plenteuousli than we axen or vndurstondun, bi the vertu that worchith in vs,
| |
| | Eph 3:21 | to hym be glorie in the chirche, and in Crist Jhesu, in to alle the generaciouns of the world of worldis. Amen.
| |
