| |
Wycliffe |   | |
 |
| |
| | Gal 6:1 | Britheren, if a man be occupied in ony gilt, ye that ben spiritual, enforme ye such oon in spirit of softnesse, biholdinge thi silf, lest that thou be temptid.
| |
| | Gal 6:2 | Ech bere othere chargis, and so ye schulen fulfille the lawe of Crist.
| |
| | Gal 6:3 | For who that trowith that he be ouyt, whanne he is nouyt, he bigilith him silf.
| |
| | Gal 6:4 | But ech man preue his owne werk, and so he schal haue glorie in him silf, and not in an othere.
| |
| | Gal 6:5 | For ech man schal bere his owne charge.
| |
| | Gal 6:6 | He that is tauyt bi word, comune he with him that techith hym, in `alle goodis.
| |
| | Gal 6:7 | Nyle ye erre, God is not scorned;
| |
| | Gal 6:8 | for tho thingis that a man sowith, tho thingis he schal repe. For he that sowith in his fleisch, of the fleisch he schal repe corrupcioun; but he that sowith in the spirit, of the spirit he schal repe euerelastynge lijf.
| |
| | Gal 6:9 | And doynge good faile we not; for in his tyme we schal repe, not failinge.
| |
| | Gal 6:10 | Therfor while we han tyme, worche we good to alle men; but most to hem that ben homliche of the feith.
| |
| | Gal 6:11 | Se ye, what maner lettris Y haue write to you with myn owne hoond.
| |
| | Gal 6:12 | For who euere wole plese in the fleisch, `this constreyneth you to be circumcidid, oonli that thei suffren not the persecucioun of Cristis crosse.
| |
| | Gal 6:13 | For nether thei that ben circumcidid kepen the lawe; but thei wolen that ye be circumcidid, that thei haue glorie in youre fleisch.
| |
| | Gal 6:14 | But fer be it fro me to haue glorie, no but in the crosse of oure Lord Jhesu Crist, bi whom the world is crucified to me, and Y to the world.
| |
| | Gal 6:15 | For in Jhesu Crist nether circumcisioun is ony thing worth, ne prepucie, but a newe creature.
| |
| | Gal 6:16 | And who euere suwen this reule, pees on hem, and merci, and on Israel of God.
| |
| | Gal 6:17 | And heraftir no man be heuy to me; for Y bere in my bodi the tokenes of oure Lord Jhesu Crist.
| |
| | Gal 6:18 | The grace of oure Lord Jhesu Crist be with youre spirit, britheren. Amen.
| |
