| |
Wycliffe |   | |
 |
| |
| | Gal 5:1 | Stonde ye therfor, and nyl ye eftsoones be holdun in the yok of seruage.
| |
| | Gal 5:2 | Lo! Y Poul seie to you, that if ye ben circumcidid, Crist schal no thing profite to you.
| |
| | Gal 5:3 | And Y witnesse eftsoones to ech man that circumcidith hym silf, that he is dettour of al the lawe to be don.
| |
| | Gal 5:4 | And ye ben voidid awei fro Crist, and ye that be iustified in the lawe, ye han fallen awei fro grace.
| |
| | Gal 5:5 | For we thoruy the spirit of bileue abiden the hope of riytfulnesse.
| |
| | Gal 5:6 | For in Jhesu Crist nether circumcisioun is ony thing worth, nether prepucie, but the bileue that worchith bi charite.
| |
| | Gal 5:7 | Ye runnen wel; who lettide you that ye obeyede not to treuthe?
| |
| | Gal 5:8 | Consente ye to no man; for this counsel ys not of hym that hath clepid you.
| |
| | Gal 5:9 | A litil souredowy apeirith al the gobet.
| |
| | Gal 5:10 | I trust on you in oure Lord, that ye schulden vndurstonde noon other thing. And who that disturblith you, schal bere dom, who euere he be.
| |
| | Gal 5:11 | And, britheren, if Y preche yit circumcisioun, what suffre Y yit persecucioun? thanne the sclaundre of the crosse is auoidid.
| |
| | Gal 5:12 | Y wolde that thei weren cut awei, that disturblen you.
| |
| | Gal 5:13 | For, britheren, ye ben clepid in to fredom; oneli yyue ye not fredom in to occasioun of fleisch, but bi charite of spirit serue ye togidere.
| |
| | Gal 5:14 | For euery lawe is fulfillid in o word, Thou schalt loue thi neiybore as thi silf.
| |
| | Gal 5:15 | And if ye bite, and ete ech othere, se ye, lest ye be wastid ech fro othere.
| |
| | Gal 5:16 | And Y seie you in Crist, walke ye in spirit, and ye schulen not performe the desiris of the fleisch.
| |
| | Gal 5:17 | For the fleisch coueitith ayens the spirit, and the spirit ayen the fleisch; for these ben aduersaries togidere, that ye don not alle thingis that ye wolen.
| |
| | Gal 5:18 | That if ye be led bi spirit, ye ben not vnder the lawe.
| |
| | Gal 5:19 | And werkis of the fleisch ben opyn, whiche ben fornicacioun, vnclennes, vnchastite, letcherie, seruice of false goddis,
| |
| | Gal 5:20 | witchecraftis, enmytees, striuyngis, indignaciouns, wraththis, chidingis, discenciouns, sectis, enuyes,
| |
| | Gal 5:21 | manslauytris, dronkennessis, vnmesurable etyngis, and thingis lijk to these, whiche Y seie to you, as Y haue told to you `to fore, for thei that doon suche thingis, schulen not haue the kyngdom of God.
| |
| | Gal 5:22 | But the fruyt of the spirit is charite, ioye, pees, pacience, long abidyng,
| |
| | Gal 5:23 | benygnyte, goodnesse, myldenesse, feith, temperaunce, contynence, chastite; ayen suche thingis is no lawe.
| |
| | Gal 5:24 | And they that ben of Crist, han crucified her fleisch with vices and coueytyngis.
| |
| | Gal 5:25 | If we lyuen bi spirit, walke we bi spirit; be we not made coueytouse of veyn glorie, stirynge ech othere to wraththe, or hauynge enuye ech to othere.
| |
