| |
Wycliffe |   | |
 |
| |
| | Gal 4:1 | But Y seie, as long tyme as the eir is a litil child, he dyuersith no thing fro a seruaunt, whanne he is lord of alle thingis;
| |
| | Gal 4:2 | but he is vndur keperis and tutoris, in to the tyme determyned of the fadir.
| |
| | Gal 4:3 | So we, whanne we weren litle children, we serueden vndur the elementis of the world.
| |
| | Gal 4:4 | But aftir that the fulfilling of tyme cam, God sente his sone,
| |
| | Gal 4:5 | maad of a womman, maad vndur the lawe, that he schulde ayenbie hem that weren vndur the lawe, that we schulden vnderfonge the adopcioun of sones.
| |
| | Gal 4:6 | And for ye ben Goddis sones, God sente his spirit in to youre hertis, criynge, Abba, fadir.
| |
| | Gal 4:7 | And so ther is not now a seruaunt, but a sone; and if he is a sone, he is an eir bi God.
| |
| | Gal 4:8 | But thanne ye vnknowynge God, serueden to hem that in kynde weren not goddis.
| |
| | Gal 4:9 | But now whanne ye han knowe God, and ben knowun of God, hou ben ye turned eftsoone to the febil and nedi elementis, to the whiche ye wolen eft serue?
| |
| | Gal 4:10 | Ye taken kepe to daies, and monethis, and tymes, and yeris.
| |
| | Gal 4:11 | But Y drede you, lest without cause Y haue trauelid among you.
| |
| | Gal 4:12 | Be ye as Y, for Y am as ye. Britheren, Y biseche you, ye han hurt me no thing.
| |
| | Gal 4:13 | But ye knowen, that bi infirmyte of fleisch Y haue prechid to you now bifore;
| |
| | Gal 4:14 | and ye dispiseden not, nether forsoken youre temptacioun in my fleisch, but ye resseyueden me as an aungel of God, as `Crist Jhesu.
| |
| | Gal 4:15 | Where thanne is youre blessyng? For Y bere you witnesse, that if it myyte haue be don. ye wolden haue put out youre iyen, and haue yyuen hem to me.
| |
| | Gal 4:16 | Am Y thanne maad an enemye to you, seiynge to you the sothe?
| |
| | Gal 4:17 | Thei louen not you wel, but thei wolen exclude you, that ye suen hem.
| |
| | Gal 4:18 | But sue ye the good euermore in good, and not oneli whanne Y am present with you.
| |
| | Gal 4:19 | My smale children, whiche Y bere eftsoones, til that Crist be fourmed in you,
| |
| | Gal 4:20 | and Y wolde now be at you, and chaunge my vois, for Y am confoundid among you.
| |
| | Gal 4:21 | Seie to me, ye that wolen be vndir the lawe, `han ye not red the lawe?
| |
| | Gal 4:22 | For it is writun, that Abraham hadde two sones, oon of a seruaunt, and oon of a fre womman.
| |
| | Gal 4:23 | But he that was of the seruaunt, was borun after the flesh; but he that was of the fre womman, by a biheeste.
| |
| | Gal 4:24 | The whiche thingis ben seid bi an othir vndirstonding. For these ben two testamentis; oon in the hille of Synai, gendringe in to seruage, which is Agar.
| |
| | Gal 4:25 | For Syna is an hille that is in Arabie, which hille is ioyned to it that is now Jerusalem, and seruith with hir children.
| |
| | Gal 4:26 | But that Jerusalem that is aboue, is fre, whiche is oure modir.
| |
| | Gal 4:27 | For it is writun, Be glad, thou bareyn, that berist not; breke out and crye, that bringist forth no children; for many sones ben of hir that is left of hir hosebonde, more than of hir that hath an hosebonde.
| |
| | Gal 4:28 | For, britheren, we ben sones of biheeste aftir Isaac;
| |
| | Gal 4:29 | but now as this that was borun after the fleisch pursuede him that was aftir the spirit, so now.
| |
| | Gal 4:30 | But what seith the scripture? Caste out the seruaunt and hir sone, for the sone of the seruaunt schal not be eir with the sone of the fre wijf.
| |
| | Gal 4:31 | And so, britheren, we ben not sones of the seruaunt, but of the fre wijf, bi which fredom Crist hath maad vs fre.
| |
