| |
Wycliffe |   | |
 |
| |
| | Gal 3:1 | Vnwitti Galathies, tofor whos iyen Jhesu Crist is exilid, and is crucified in you, who hath disseyued you, that ye obeyen not to treuthe?
| |
| | Gal 3:2 | This oneli Y wilne to lerne of you, whether ye han vndurfonge the spirit of werkis of the lawe, or of heryng of bileue?
| |
| | Gal 3:3 | So ye ben foolis, that whanne ye han bigunne in spirit, ye ben endid in fleisch.
| |
| | Gal 3:4 | So grete thingis ye han suffrid without cause, if it be withoute cause.
| |
| | Gal 3:5 | He that yyueth to you spirit, and worchith vertues in you, whether of werkis of the lawe, or of hering of bileue?
| |
| | Gal 3:6 | As it is writun, Abraham bileuede to God, and it was rettid to hym to riytfulnesse.
| |
| | Gal 3:7 | And therfor knowe ye, that these that ben of bileue, ben the sones of Abraham.
| |
| | Gal 3:8 | And the scripture seynge afer, that God iustifieth the hethene, of bileue told tofor to Abraham, That in thee alle the hethene schulen be blessid.
| |
| | Gal 3:9 | And therfor these that ben of bileue, schulen be blessid with feithful Abraham.
| |
| | Gal 3:10 | For alle that ben of the werkis of the lawe, ben vndur curse; for it is writun, Ech man is cursid, that abidith not in alle thingis that ben writun in the book of the lawe, to do tho thingis.
| |
| | Gal 3:11 | And that no man is iustified in the lawe bifor God, it is opyn, for a riytful man lyueth of bileue.
| |
| | Gal 3:12 | But the lawe is not of bileue, but he that doith tho thingis of the lawe, schal lyue in hem.
| |
| | Gal 3:13 | But Crist ayenbouyte us fro the curse of the lawe, and was maad acursid for vs; for it is writun, Ech man is cursid that hangith in the tre;
| |
| | Gal 3:14 | that among the hethene the blessyng of Abraham were maad in `Crist Jhesu, that we vndurfonge the biheeste of spirit thoruy bileue.
| |
| | Gal 3:15 | Britheren, Y seie aftir man, no man dispisith the testament of a man that is confermed, or ordeyneth aboue.
| |
| | Gal 3:16 | The biheestis weren seid to Abraham and to his seed; he seith not, In seedis, as in many, but as in oon, And to thi seed, that is, Crist.
| |
| | Gal 3:17 | But Y seie, this testament is confermed of God; the lawe that was maad after foure hundrid and thritti yeer, makith not the testament veyn to auoide awei the biheest.
| |
| | Gal 3:18 | For if eritage were of the lawe, it were not now of biheeste. But God grauntide to Abraham thoruy biheest.
| |
| | Gal 3:19 | What thanne the lawe? It was sett for trespassing, to the seed come, to whom he hadde maad his biheest. Whiche lawe was ordeyned bi aungels, in the hoond of a mediatour. But a mediatour is not of oon. But God is oon.
| |
| | Gal 3:21 | Is thanne the lawe ayens the biheestis of God? God forbede. For if the lawe were youun, that myyte quikene, verili were riytfulnesse of lawe.
| |
| | Gal 3:22 | But scripture hath concludid alle thingis vndir synne, that the biheeste of the feith of Jhesu Crist were yyuen to hem that bileuen.
| |
| | Gal 3:23 | And tofor that bileue cam, thei weren kept vndur the lawe, enclosid in to that bileue that was to be schewid.
| |
| | Gal 3:24 | And so the lawe was oure vndirsmaister in Crist, that we ben iustified of bileue.
| |
| | Gal 3:25 | But aftir that bileue cam, we ben not now vndur the vndurmaistir.
| |
| | Gal 3:26 | For alle ye ben the children of God thoruy the bileue of Jhesu Crist.
| |
| | Gal 3:27 | For alle ye that ben baptisid, ben clothid with Crist.
| |
| | Gal 3:28 | Ther is no Jewe, ne Greke, ne bond man, ne fre man, ne male, ne female; for alle ye ben oon in `Jhesu Crist.
| |
| | Gal 3:29 | And if ye ben oon in `Jhesu Crist, thanne ye ben the seed of Abraham, and eiris bi biheest.
| |
