| |
Wycliffe |   | |
 |
| |
| | Gal 1:1 | Poul the apostle, not of men, ne bi man, but bi Jhesu Crist, and God the fadir,
| |
| | Gal 1:2 | that reiside hym fro deth, and alle the britheren that ben with me, to the chirchis of Galathie,
| |
| | Gal 1:3 | grace to you and pees of God the fadir, and of the Lord Jhesu Crist,
| |
| | Gal 1:4 | that yaf hym silf for oure synnes, to delyuere vs fro the present wickid world, bi the wille of God and of oure fadir,
| |
| | Gal 1:5 | to whom is worschip and glorie in to worldis of worldis. Amen.
| |
| | Gal 1:6 | I wondur, that so soone ye be thus moued fro hym that clepid you in to the grace of Crist, in to another euangelie; which is not anothir,
| |
| | Gal 1:7 | but that ther ben summe that troublen you, and wolen mysturne the euangelie of Crist.
| |
| | Gal 1:8 | But thouy we, or an aungel of heuene, prechide to you, bisidis that that we han prechid to you, be he acursid.
| |
| | Gal 1:9 | As Y haue seid bifore, and now eftsoones Y seie, if ony preche to you bisidis that that ye han vndurfongun, be he cursid.
| |
| | Gal 1:10 | For now whether counsele Y men, or God? or whether Y seche to plese men? If Y pleside yit men, Y were not Cristis seruaunt.
| |
| | Gal 1:11 | For, britheren, Y make knowun to you the euangelie, that was prechid of me, for it is not bi man;
| |
| | Gal 1:12 | ne Y took it of man, ne lernyde, but bi reuelacioun of Jhesu Crist.
| |
| | Gal 1:13 | For ye han herd my conuersacioun sumtyme in the Jurie, and that Y pursuede passyngli the chirche of God, and fauyt ayen it.
| |
| | Gal 1:14 | And Y profitide in the Jurie aboue many of myn eueneldis in my kynrede, and was more aboundauntli a folewere of my fadris tradiciouns.
| |
| | Gal 1:15 | But whanne it pleside hym, that departide me fro my modir wombe,
| |
| | Gal 1:16 | and clepide bi his grace, to schewe his sone in me, that Y schulde preche hym among the hethene, anoon Y drowy me not to fleisch and blood; ne Y cam to Jerusalem to the apostlis,
| |
| | Gal 1:17 | that weren tofor me, but Y wente in to Arabie, and eftsoones Y turnede ayen in to Damask.
| |
| | Gal 1:18 | And sith thre yeer aftir Y cam to Jerusalem, to se Petre, and Y dwellide with hym fiftene daies;
| |
| | Gal 1:19 | but Y sawy noon othere of the apostlis, but James, oure Lordis brother.
| |
| | Gal 1:20 | And these thingis which Y write to you, lo! tofor God Y lie not.
| |
| | Gal 1:21 | Afterward Y cam in to the coostis of Syrie and Cilicie.
| |
| | Gal 1:22 | But Y was vnknowun bi face to the chirchis of Judee, that weren in Crist; and thei hadden oonli an heryng,
| |
| | Gal 1:23 | that he that pursuede vs sum tyme, prechide now the feith, ayens which he fauyte sum tyme;
| |
| | Gal 1:24 | and in me thei glorifieden God.
| |
