| |
Wycliffe |   | |
 |
| |
| | 1Cr 5:1 | In al maner fornycacioun is herd among you, and siche fornycacioun, which is not among hethene men, so that summan haue the wijf of his fadir.
| |
| | 1Cr 5:2 | And ye ben bolnyd with pride, and not more hadden weilyng, that he that dide this werk, be takun awei fro the myddil of you.
| |
| | 1Cr 5:3 | And Y absent in bodi, but present in spirit, now haue demyd as present hym that hath thus wrouyt, whanne
| |
| | 1Cr 5:4 | ye ben gaderid togidere in the name of oure Lord Jhesu Crist, and my spirit, with the vertu of the Lord Jhesu,
| |
| | 1Cr 5:5 | to take siche a man to Sathanas, in to the perischyng of fleisch, that the spirit be saaf in the dai of oure Lord Jhesu Crist.
| |
| | 1Cr 5:6 | Youre gloriyng is not good. Witen ye not, that a litil sourdow apeyrith al the gobet?
| |
| | 1Cr 5:7 | Clense ye out the old sourdow, that ye be new sprengyng togidere, as ye ben therf. For Crist offrid is oure pask.
| |
| | 1Cr 5:8 | Therfor ete we, not in eld sourdowy, nether in sourdowy of malice and weywardnesse, but in therf thingis of clernesse and of treuthe.
| |
| | 1Cr 5:9 | I wroot to you in a pistle, that ye be not medlid with letchours,
| |
| | 1Cr 5:10 | not with letchours of this world, ne coueitous men, ne raueynours, ne with men seruynge to mawmetis, ellis ye schulden haue go out of this world.
| |
| | 1Cr 5:11 | But now Y wroot to you, that ye be not meynd. But if he that is named a brother among you, and is a letchour, or coueitouse, or seruynge to ydols, or cursere, or ful of drunkenesse, or raueynour, to take no mete with siche.
| |
| | 1Cr 5:12 | For what is it to me to deme of hem that ben with oute forth? Whether ye demen not of thingis that ben with ynne forth?
| |
| | 1Cr 5:13 | For God schal deme hem that ben withouten forth. Do ye awei yuel fro you silf.
| |
