| |
Wycliffe |   | |
 |
| |
| | 1Cr 4:1 | So a man gesse vs, as mynystris of Crist, and dispenderis of the mynysteries of God.
| |
| | 1Cr 4:2 | Now it is souyt here among the dispenderis, that a man be foundun trewe.
| |
| | 1Cr 4:3 | And to me it is for the leest thing, that Y be demyd of you, or of mannus dai; but nether Y deme my silf.
| |
| | 1Cr 4:4 | For Y am no thing ouer trowynge to my silf, but not in this thing Y am iustified; for he that demeth me, is the Lord.
| |
| | 1Cr 4:5 | Therfor nyle ye deme bifore the tyme, til that the Lord come, which schal liytne the hyd thingis of derknessis, and schal schewe the counseils of hertis; and thanne preisyng schal be to ech man of God.
| |
| | 1Cr 4:6 | And, britheren, Y haue transfigurid these thingis in to me and in to Apollo, for you; that in vs ye lerne, lest ouer that it is writun, oon ayens another be blowun with pride for another.
| |
| | 1Cr 4:7 | Who demeth thee? And what hast thou, that thou hast not resseyued? And if thou hast resseyued, what gloriest thou, as thou haddist not resseyued?
| |
| | 1Cr 4:8 | Nowe ye ben fyllid, now ye ben maad riche; ye regnen with outen vs; and Y wolde that ye regnen, that also we regnen with you.
| |
| | 1Cr 4:9 | And Y gesse, that God schewide vs the laste apostlis, as thilke that ben sent to the deth; for we ben maad a spectacle to the world, and to aungels, and to men.
| |
| | 1Cr 4:10 | We foolis for Crist, but ye prudent in Crist; we sike, but ye stronge; ye noble, but we vnnoble.
| |
| | 1Cr 4:11 | Til in to this our we hungren, and thirsten, and ben nakid, and ben smytun with buffatis,
| |
| | 1Cr 4:12 | and we ben vnstable, and we trauelen worchynge with oure hondis; we ben cursid, and we blessen; we suffren persecucioun, and we abiden longe; we ben blasfemyd, and we bisechen;
| |
| | 1Cr 4:13 | as clensyngis of this world we ben maad the `out castyng of alle thingis `til yit.
| |
| | 1Cr 4:14 | Y write not these thingis, that Y confounde you, but Y warne as my moste dereworthe sones.
| |
| | 1Cr 4:15 | For whi if ye han ten thousynde of vndur maistris in Crist, but not many fadris; for in Crist Jhesu Y haue gendrid you bi the gospel.
| |
| | 1Cr 4:16 | Therfor, britheren, Y preye you, be ye foleweris of me, as Y of Crist.
| |
| | 1Cr 4:17 | Therfor Y sente to you Tymothe, which is my most dereworthe sone, and feithful in the Lord, which schal teche you my weies, that ben in Crist Jhesu; as Y teche euery where in ech chirche.
| |
| | 1Cr 4:18 | As thouy Y schulde not come to you, so summe ben blowun with pride;
| |
| | 1Cr 4:19 | but Y schal come to you soone, if God wole; and Y schal knowe not the word of hem that ben blowun with pride, but the vertu.
| |
| | 1Cr 4:20 | For the rewme of God is not in word, but in vertu.
| |
| | 1Cr 4:21 | What wole ye? Schal Y come to you in a yerde, or in charite, and in spirit of myldenesse?
| |
