| |
Wycliffe |   | |
 |
| |
| | 1Cr 3:1 | And Y, britheren, myyte not speke to you as to spiritual men, but as to fleischli men;
| |
| | 1Cr 3:2 | as to litle children in Crist, Y yaf to you mylk drynke, not mete; for ye myyten not yit, nether ye moun now, for yit ye ben fleischli.
| |
| | 1Cr 3:3 | For while strijf is among you, whether ye ben not fleischli, and ye gon aftir man?
| |
| | 1Cr 3:4 | For whanne summe seith, Y am of Poul, another, But Y am of Apollo, whethir ye ben not men? What therfor is Apollo, and what Poul?
| |
| | 1Cr 3:5 | Thei ben mynystris of hym, to whom ye han bileuyd; and to ech man as God hath youun.
| |
| | 1Cr 3:6 | Y plauntide, Apollo moystide, but God yaf encreessyng.
| |
| | 1Cr 3:7 | Therfor nether he that plauntith is ony thing, nethir he that moistith, but God that yiueth encreessyng.
| |
| | 1Cr 3:8 | And he that plauntith, and he that moistith, ben oon; and ech schal take his owne mede, aftir his trauel.
| |
| | 1Cr 3:9 | For we ben the helperis of God; ye ben the erthetiliyng of God, ye ben the bildyng of God.
| |
| | 1Cr 3:10 | Aftir the grace `of God that is youun to me, as a wise maistir carpenter Y settide the foundement; and another bildith aboue. But ech man se, hou he bildith aboue.
| |
| | 1Cr 3:11 | For no man may sette another foundement, outtakun that that is sett, which is Crist Jhesus.
| |
| | 1Cr 3:12 | For if ony bildith ouer this foundement, gold, siluer, preciouse stoonys, stickis, hey, or stobil, euery mannus werk schal be open;
| |
| | 1Cr 3:13 | for the dai of the Lord schal declare, for it schal be schewid in fier; the fier schal preue the werk of ech man, what maner werk it is.
| |
| | 1Cr 3:14 | If the werk of ony man dwelle stille, which he bildide aboue, he schal resseyue mede.
| |
| | 1Cr 3:15 | If ony mannus werk brenne, he schal suffre harm; but he schal be saaf, so netheles as bi fier.
| |
| | 1Cr 3:16 | Witen ye not, that ye ben the temple of God, and the spirit of God dwellith in you?
| |
| | 1Cr 3:17 | And if ony defoulith the temple of God, God schal leese hym; for the temple of God is hooli, which ye ben.
| |
| | 1Cr 3:18 | No man disseyue hym silf. If ony man among you is seyn to be wiys in this world, be he maad a fool, that he be wijs.
| |
| | 1Cr 3:19 | For the wisdom of this world is foli anentis God; for it is writun, Y schal catche wise men in her fel wisdom;
| |
| | 1Cr 3:20 | and eft, The Lord knowith the thouytis of wise men, for tho ben veyn.
| |
| | 1Cr 3:21 | Therfor no man haue glorie in men.
| |
| | 1Cr 3:22 | For alle thingis ben youre, ethir Poul, ether Apollo, ether Cefas, ether the world, ether lijf, ether deth, ether thingis present, ethir thingis to comynge; for alle thingis ben youre,
| |
| | 1Cr 3:23 | and ye ben of Crist, and Crist is of God.
| |
