| |
Wycliffe |   | |
 |
| |
| | 1Cr 15:1 | `Sotheli, britheren, Y make the gospel knowun to you, which Y haue prechid to you, the which also ye han takun, in which ye stonden,
| |
| | 1Cr 15:2 | also bi which ye schulen be sauyd; `bi which resoun Y haue prechid to you, if ye holden, `if ye han not bileuyd ideli.
| |
| | 1Cr 15:3 | For Y bitook to you at the bigynnyng that thing which also Y haue resseyued; that Crist was deed for oure synnes, bi the scripturis;
| |
| | 1Cr 15:4 | and that he was biried, and that he roos ayen in the thridde dai, after scripturis;
| |
| | 1Cr 15:5 | and that he was seyn to Cephas, and aftir these thingis to enleuene;
| |
| | 1Cr 15:6 | aftirward he was seyn to mo than fyue hundrid britheren togidere, of whiche manye lyuen yit, but summe ben deed; aftirward he was seyn to James,
| |
| | 1Cr 15:7 | and aftirward to alle the apostlis.
| |
| | 1Cr 15:8 | And last of alle he was seyn also to me, as to a deed borun child.
| |
| | 1Cr 15:9 | For Y am the leste of apostlis, that am not worthi to be clepid apostle, for Y pursuede the chirche of God.
| |
| | 1Cr 15:10 | But bi the grace of God Y am that thing that Y am; and his grace was not voide in me. For Y trauelide more plenteuously than alle thei; but not Y, but the grace of God with me.
| |
| | 1Cr 15:11 | But whether Y, or thei, so we han prechid, and so ye han bileuyd.
| |
| | 1Cr 15:12 | And if Crist is prechid, that he roos ayen fro deeth, hou seien summen among you, that the ayenrisyng of deed men is not?
| |
| | 1Cr 15:13 | And if the ayenrisyng of deed men is not, nethir Crist roos ayen fro deeth.
| |
| | 1Cr 15:14 | And if Crist roos not, oure preching is veyn, oure feith is veyn.
| |
| | 1Cr 15:15 | And we ben foundun false witnessis of God, for we han seid witnessyng ayens God, that he reiside Crist, whom he reiside not, if deed men risen not ayen.
| |
| | 1Cr 15:16 | Forwhi if deed men risen not ayen, nether Crist roos ayen;
| |
| | 1Cr 15:17 | and if Crist roos not ayen, oure feith is veyn; and yit ye ben in youre synnes.
| |
| | 1Cr 15:18 | And thanne thei that han diede in Crist, han perischid.
| |
| | 1Cr 15:19 | If in this life oneli we ben hoping in Crist, we ben more wretchis than alle men.
| |
| | 1Cr 15:20 | But now Crist roos ayen fro deth, the firste fruit of deed men;
| |
| | 1Cr 15:21 | for deeth was bi a man, and bi a man is ayenrisyng fro deth.
| |
| | 1Cr 15:22 | And as in Adam alle men dien, so in Crist alle men schulen be quykenyd.
| |
| | 1Cr 15:23 | But ech man in his ordre; the firste fruit, Crist, afterward thei that ben of Crist, that bileueden in the comyng of Crist;
| |
| | 1Cr 15:24 | aftirward an ende, whanne he schal bitake the kyngdom to God and to the fadir, whanne he schal auoide al princehod, and power, and vertu.
| |
| | 1Cr 15:25 | But it bihoueth hym to regne, til he putte alle hise enemyes vndur hise feet.
| |
| | 1Cr 15:26 | And at the laste, deth the enemye schal be distried; for he hath maad suget alle thingis vndur hise feet.
| |
| | 1Cr 15:27 | And whanne he seith, alle thingis ben suget to hym, with outen doubt outakun hym that sugetide alle thingis to hym.
| |
| | 1Cr 15:28 | And whanne alle thingis ben suget to hym, thanne the sone hym silf schal be suget to hym, that made `alle thingis suget to hym, that God be alle thingis in alle thingis.
| |
| | 1Cr 15:29 | Ellis what schulen thei do, that ben baptisid for deed men, if in no wise deed men risen ayen? wherto ben thei baptisid for hem?
| |
| | 1Cr 15:30 | And wherto ben we in perel euery our?
| |
| | 1Cr 15:31 | Ech dai Y die for youre glorie, britheren, which glorie Y haue in Crist Jhesu oure Lord.
| |
| | 1Cr 15:32 | If aftir man Y haue fouyten to beestis at Efesi, what profitith it to me, if deed men risen not ayen? Ete we, and drynke we, for we schulen die to morewe.
| |
| | 1Cr 15:33 | Nyle ye be disseyued; for yuel spechis distrien good thewis.
| |
| | 1Cr 15:34 | Awake ye, iuste men, and nyle ye do synne; for summen han ignoraunce of God, but to reuerence Y speke to you.
| |
| | 1Cr 15:35 | But summan seith, Hou schulen deed men rise ayen, or in what maner bodi schulen thei come?
| |
| | 1Cr 15:36 | Vnwise man, that thing that thou sowist, is not quykened, but it die first;
| |
| | 1Cr 15:37 | and that thing that thou sowist, `thou sowist not the bodi that is to come, but a nakid corn, as of whete, or of summe othere seedis;
| |
| | 1Cr 15:38 | and God yyueth to it a bodi, as he wole, and to ech of seedis a propir bodi.
| |
| | 1Cr 15:39 | Not ech fleisch is the same fleisch, but oon is of men, another is of beestis, another is of briddis, an othere of fischis.
| |
| | 1Cr 15:40 | And `heuenli bodies ben, and `ertheli bodies ben; but oon glorie is of heuenely bodies, and anothir is of ertheli.
| |
| | 1Cr 15:41 | An othere clerenesse is of the sunne, anothere clerenesse is of the moone, and anothere clerenesse is of sterris; and a sterre dyuersith fro a sterre in clerenesse.
| |
| | 1Cr 15:42 | And so the ayenrisyng of deed men. It is sowun in corrupcioun, it schal rise in vncorrupcioun;
| |
| | 1Cr 15:43 | it is sowun in vnnoblei, it schal rise in glorie; it is sowun in infirmyte, it schal rise in vertu;
| |
| | 1Cr 15:44 | it is sowun a beestly bodi, it schal rise a spiritual bodi. If ther is a beestli bodi, ther is also a spiritual bodi;
| |
| | 1Cr 15:45 | as it is writun, The firste man Adam was maad in to a soule lyuynge, the laste Adam in to a spirit quykenynge.
| |
| | 1Cr 15:46 | But the firste is not that that is spiritual, but that that is beestlich, aftirward that that is spiritual.
| |
| | 1Cr 15:47 | The firste man of erthe is ertheli; the secounde man of heuene is heuenelich.
| |
| | 1Cr 15:48 | Such as the ertheli man is, such ben the ertheli men; and such as the heueneli man is, suche ben also the heueneli men.
| |
| | 1Cr 15:49 | Therfor as we han bore the ymage of the ertheli man, bere we also the ymage of the heuenli.
| |
| | 1Cr 15:50 | Britheren, Y seie this thing, that fleisch and bloud moun not welde the kyngdom of God, nethir corrupcioun schal welde vncorrupcioun.
| |
| | 1Cr 15:51 | Lo! Y seie to you priuyte of hooli thingis. And alle we schulen rise ayen, but not alle we schulen be chaungid;
| |
| | 1Cr 15:52 | in a moment, in the twynklyng of an iye, in the laste trumpe; for the trumpe schal sowne, and deed men schulen rise ayen, with oute corrupcioun, and we schulen be chaungid.
| |
| | 1Cr 15:53 | For it byhoueth this corruptible thing to clothe vncorrupcioun, and this deedli thing to putte awei vndeedlinesse.
| |
| | 1Cr 15:54 | But whanne this deedli thing schal clothe vndeedlynesse, thanne schal the word be doon, that is writun, Deth is sopun vp in victorie.
| |
| | 1Cr 15:55 | Deth, where is thi victorie? Deth, where is thi pricke?
| |
| | 1Cr 15:56 | But the pricke of deth is synne; and the vertu of synne is the lawe.
| |
| | 1Cr 15:57 | But do we thankyngis to God, that yaf to vs victorie bi oure Lord Jhesu Crist.
| |
| | 1Cr 15:58 | Therfore, my dereworthe britheren, be ye stidefast, and vnmouable, beynge plenteuouse in werk of the Lord, euere more witynge that youre trauel is not idel in the Lord.
| |
