| |
Wycliffe |   | |
 |
| |
| | 1Cr 10:1 | Britheren, Y nyle, that ye vnknowe, that alle oure fadris weren vndur cloude, and alle passiden the see;
| |
| | 1Cr 10:2 | and alle weren baptisid in Moises, in the cloude and in the see;
| |
| | 1Cr 10:3 | and alle eeten the same spiritual mete,
| |
| | 1Cr 10:4 | and alle drunken the same spiritual drynke; thei drunken of the spiritual stoon folewynge hem; and the stoon was Crist.
| |
| | 1Cr 10:5 | But not in ful manye of hem it was wel pleasaunt to God; for whi thei weren cast doun in desert.
| |
| | 1Cr 10:6 | But these thingis ben don in figure of vs, that we be not coueyteris of yuele thingis, as thei coueitiden.
| |
| | 1Cr 10:7 | Nether be ye maad idolatreris, as summe of hem; as it is writun, The puple sat to ete and drynke, and thei risen vp to pleie.
| |
| | 1Cr 10:8 | Nether do we fornycacioun, as summe of hem diden fornicacioun, and thre and twenti thousyndis weren deed in o dai.
| |
| | 1Cr 10:9 | Nethir tempte we Crist, as summe of hem temptiden, and perischiden of serpentis.
| |
| | 1Cr 10:10 | Nether grutche ye, as summe of hem grutchiden, and thei perischiden of a distrier.
| |
| | 1Cr 10:11 | And alle these thingis felliden to hem in figure; but thei ben writun to oure amendyng, in to whiche the endis of the worldis ben comun.
| |
| | 1Cr 10:12 | Therfor he that gessith hym, `that he stondith, se he, that he falle not.
| |
| | 1Cr 10:13 | Temptacioun take `not you, but mannus temptacioun; for God is trewe, which schal not suffre you to be temptid aboue that that ye moun; but he schal make with temptacioun also purueyaunce, that ye moun suffre.
| |
| | 1Cr 10:14 | Wherfor, ye most dereworthe to me, fle ye fro worschiping of maumetis.
| |
| | 1Cr 10:15 | As to prudent men Y speke, deme ye you silf that thing that Y seie.
| |
| | 1Cr 10:16 | Whether the cuppe of blessyng which we blessen, is not the comynyng of Cristis blood? and whether the breed which we breken, is not the takyng of the bodi of the Lord?
| |
| | 1Cr 10:17 | For we manye ben o breed and o bodi, alle we that taken part of o breed and of o cuppe.
| |
| | 1Cr 10:18 | Se ye Israel aftir the fleisch, whethir thei that eeten sacrifices, ben not partyneris of the auter?
| |
| | 1Cr 10:19 | What therfor seie Y, that a thing that is offrid to idols is ony thing, or that the idol is ony thing?
| |
| | 1Cr 10:20 | But tho thingis that hethene men offren, thei offren to deuelis, and not to God. But Y nyle, that ye ben maad felowis of feendis; for ye moun not drynke the cuppe of the Lord, and the cuppe of fendis;
| |
| | 1Cr 10:21 | ye moun not be parteneris of the boord of the Lord, and of the bord of feendis.
| |
| | 1Cr 10:22 | Whether we han enuye to the Lord? whether we ben strengere then he? Alle thingis ben leeueful to me, but not alle thingis ben spedeful.
| |
| | 1Cr 10:23 | Alle thingis ben leeueful to me, but not alle thingis edifien.
| |
| | 1Cr 10:24 | No man seke that thing that is his owne, but that thing that is of an othere.
| |
| | 1Cr 10:25 | Al thing that is seld in the bocherie, ete ye, axynge no thing for conscience.
| |
| | 1Cr 10:26 | The erthe and the plente of it is, the Lordis.
| |
| | 1Cr 10:27 | If ony of hethene men clepith you to soper, and ye wole go, al thing that is set to you, ete ye, axynge no thing for conscience.
| |
| | 1Cr 10:28 | But if ony man seith, This thing is offrid to idols, nyle ye ete, for hym that schewide, and for conscience; and Y seie not,
| |
| | 1Cr 10:29 | thi conscience, but of an othere. But wherto is my fredom demed of an othere mannus conscience?
| |
| | 1Cr 10:30 | Therfor if Y take part with grace, what am Y blasfemed, for that that Y do thankyngis?
| |
| | 1Cr 10:31 | Therfor whether ye eten, or drynken, or don ony other thing, do ye alle thingis `in to the glorie of God.
| |
| | 1Cr 10:32 | Be ye with outen sclaundre to Jewis, and to hethene men, and to the chirche of God;
| |
| | 1Cr 10:33 | as Y bi alle thingis plese to alle men, not sekynge that that is profitable to me, but that that is profitable to manye men, that thei be maad saaf.
| |
