| |
Wycliffe |   | |
 |
| |
| | 1Cr 1:1 | Poul, clepid apostle of Jhesu Crist, bi the wille of God, and Sostenes, brothir, to the chirche of God that is at Corynthe,
| |
| | 1Cr 1:2 | to hem that ben halewid in Crist Jhesu, and clepid seyntis, with alle that inwardli clepen the name of oure Lord Jhesu Crist, in ech place of hem and of oure,
| |
| | 1Cr 1:3 | grace to you and pees of God, oure fadir, and of the Lord Jhesu Crist.
| |
| | 1Cr 1:4 | Y do thankyngis to my God eueremore for you, in the grace of God that is youun to you in Crist Jhesu.
| |
| | 1Cr 1:5 | For in alle thingis ye ben maad riche in hym, in ech word, and in ech kunnyng,
| |
| | 1Cr 1:6 | as the witnessyng of Crist is confermyd in you;
| |
| | 1Cr 1:7 | so that no thing faile to you in ony grace, that abiden the schewyng of oure Lord Jhesu Crist;
| |
| | 1Cr 1:8 | which also schal conferme you in to the ende with outen cryme, in the dai of the comyng of oure Lord Jhesu Crist.
| |
| | 1Cr 1:9 | `A trewe God, bi whom ye ben clepid in to the felouschipe of his sone Jhesu Crist oure Lord.
| |
| | 1Cr 1:10 | But, britheren, Y biseche you, bi the name of oure Lord Jhesu Crist, that ye alle seie the same thing, and that dissenciouns be not among you; but be ye perfit in the same wit, and in the same kunnyng.
| |
| | 1Cr 1:11 | For, my britheren, it is teld to me of hem that ben at Cloes, that stryues ben among you.
| |
| | 1Cr 1:12 | And Y seie that, that ech of you seith, For Y am of Poul, and Y am of Apollo, and Y am of Cefas, but Y am of Crist.
| |
| | 1Cr 1:13 | Whether Crist is departid? whether Poul was crucified for you, ether ye ben baptisid in the name of Poul?
| |
| | 1Cr 1:14 | Y do thankyngis to my God, that Y baptiside noon of you, but Crispus and Gayus;
| |
| | 1Cr 1:15 | lest ony man seie, that ye ben baptisid in my name.
| |
| | 1Cr 1:16 | And Y baptiside also the hous of Stephan, but Y woot not, that Y baptiside ony other.
| |
| | 1Cr 1:17 | For Crist sente me not to baptise, but to preche the gospel; not in wisdom of word, that the cros of Crist be not voidid awei.
| |
| | 1Cr 1:18 | For the word of the cros is foli to hem that perischen; but to hem that ben maad saaf, that is to seie, to vs, it is the vertu of God.
| |
| | 1Cr 1:19 | For it is writun, Y schal distruye the wisdom of wise men, and Y schal reproue the prudence of prudent men.
| |
| | 1Cr 1:20 | Where is the wise man? where is the wise lawiere? where is the purchasour of this world? Whether God hath not maad the wisdom of this world fonned?
| |
| | 1Cr 1:21 | For the world in wisdom of God knewe not God bi wisdom, it pleside to God, bi foli of prechyng, `to maken hem saaf that bileueden.
| |
| | 1Cr 1:22 | For Jewis seken signes, and Grekis seken wisdom;
| |
| | 1Cr 1:23 | but we prechen Crist crucified, to Jewis sclaundre, and to hethene men foli;
| |
| | 1Cr 1:24 | but to tho Jewis and Grekis that ben clepid, we prechen Crist the vertu of God and the wisdom of God.
| |
| | 1Cr 1:25 | For that that is foli thing of God, is wiser than men; and that that is the feble thing of God, is strengere than men.
| |
| | 1Cr 1:26 | But, britheren, se ye youre clepyng; for not many wise men aftir the fleisch, not many myyti, not many noble.
| |
| | 1Cr 1:27 | But God chees tho thingis that ben fonned of the world, to confounde wise men;
| |
| | 1Cr 1:28 | and God chees the feble thingis of the world, to confounde the stronge thingis; and God chees the vnnoble thingis `and dispisable thingis of the world, and tho thingis that ben not, to distruye tho thingis that ben;
| |
| | 1Cr 1:29 | that ech man haue not glorie in his siyt.
| |
| | 1Cr 1:30 | But of hym ye ben in Crist Jhesu, which is maad of God to vs wisdom, and riytwisnesse, and holynesse, and ayenbiyng; that,
| |
| | 1Cr 1:31 | as it is wrytun, He that glorieth, haue glorie in the Lord.
| |
