| |
Wycliffe |   | |
 |
| |
| | Rom 2:1 | Wherfor thou art vnexcusable, ech man that demest, for in what thing thou demest anothir man, thou condempnest thi silf; for thou doist the same thingis whiche thou demest.
| |
| | Rom 2:2 | And we witen, that the doom of God is aftir treuthe ayens hem, that don siche thingis.
| |
| | Rom 2:3 | But gessist thou, man, that demest hem that doen siche thingis, and thou doist tho thingis, that thou schalt ascape the doom of God?
| |
| | Rom 2:4 | Whether `dispisist thou the richessis of his goodnesse, and the pacience, and the long abidyng? Knowist thou not, that the benygnyte of God ledith thee to forthenkyng?
| |
| | Rom 2:5 | But aftir thin hardnesse and vnrepentaunt herte, thou tresorist to thee wraththe in the dai of wraththe and of schewyng of the riytful doom of God,
| |
| | Rom 2:6 | that schal yelde to ech man aftir his werkis;
| |
| | Rom 2:7 | sotheli to hem that ben bi pacience of good werk, glorie, and onour, and vncorrupcioun, to hem that seken euerlastynge lijf;
| |
| | Rom 2:8 | but to hem that ben of strijf, and that assenten not to treuthe, but bileuen to wickidnesse, wraththe and indignacioun, tribulacioun and angwisch,
| |
| | Rom 2:9 | in to ech soule of man that worchith yuel, to the Jew first, and to the Greke;
| |
| | Rom 2:10 | but glorie, and honour, and pees, to ech man that worchith good thing, to the Jew first, and to the Greke.
| |
| | Rom 2:11 | For accepcioun of persones is not anentis God.
| |
| | Rom 2:12 | For who euere han synned without the lawe, schulen perische withouten the lawe; and who euere han synned in the lawe, thei schulen be demyd bi the lawe.
| |
| | Rom 2:13 | For the hereris of lawe ben not iust anentis God, but the doeris of the lawe schulen be maad iust.
| |
| | Rom 2:14 | For whanne hethene men that han not lawe, don kyndli tho thingis that ben of the lawe, thei not hauynge suche manere lawe, ben lawe to hem silf,
| |
| | Rom 2:15 | that schewen the werk of the lawe writun in her hertis. For the conscience of hem yeldith to hem a witnessyng bytwixe hem silf of thouytis that ben accusynge or defendynge,
| |
| | Rom 2:16 | in the dai whanne God schal deme the priuy thingis of men aftir my gospel, bi Jhesu Crist.
| |
| | Rom 2:17 | But if thou art named a Jew, and restist in the lawe, and hast glorie in God,
| |
| | Rom 2:18 | and hast knowe his wille, and thou lerud bi lawe preuest the more profitable thingis,
| |
| | Rom 2:19 | and tristist thi silf to be a ledere of blynde men, the liyt of hem that ben in derknessis,
| |
| | Rom 2:20 | a techere of vnwise men, a maistir of yonge children, that hast the foorme of kunnyng and of treuthe in the lawe;
| |
| | Rom 2:21 | what thanne techist thou another, and techist not thi silf? Thou that prechist that me schal not stele, stelist?
| |
| | Rom 2:22 | Thou that techist that me schal `do no letcherie, doist letcherie? Thou that wlatist maumetis, doist sacrilegie?
| |
| | Rom 2:23 | Thou that hast glorie in the lawe, vnworschipist God bi brekyng of the lawe?
| |
| | Rom 2:24 | For the name of God is blasfemed bi you among hethene men, as is writun.
| |
| | Rom 2:25 | For circumcisioun profitith, if thou kepe the lawe; but if thou be a trespassour ayens the lawe, thi circumsicioun is maad prepucie.
| |
| | Rom 2:26 | Therfor if prepucie kepe the riytwisnessis of the lawe, whethir his prepucie schal not be arettid in to circumcisioun?
| |
| | Rom 2:27 | And the prepucie of kynde that fulfillith the lawe, schal deme thee, that bi lettre and circumcisioun art trespassour ayens the lawe.
| |
| | Rom 2:28 | For he that is in opene is not a Jew, nether it is circumsicioun that is openli in the fleisch;
| |
| | Rom 2:29 | but he that is a Jew in hid, and the circumcisioun of herte, in spirit, not bi the lettre, whos preisyng is not of men, but of God.
| |
