| |
Wycliffe |   | |
 |
| |
| | Rom 15:1 | But we saddere men owen to susteyne the feblenesses of sijke men, and not plese to vs silf.
| |
| | Rom 15:2 | Eche of vs plese to his neiybore in good, to edificacioun.
| |
| | Rom 15:3 | For Crist pleside not to hym silf, as it is writun, The repreues of men dispisynge thee, felden on me.
| |
| | Rom 15:4 | For what euere thingis ben writun, tho ben writun to oure techynge, that bi pacience and coumfort of scripturis we haue hope.
| |
| | Rom 15:5 | But God of pacience and of solace yyue to you to vndurstonde the same thing, ech in to othere aftir Jhesu Crist,
| |
| | Rom 15:6 | that ye of o wille with o mouth worschipe God and the fadir of oure Lord Jhesu Crist.
| |
| | Rom 15:7 | For which thing take ye togidere, as also Crist took you in to the onour of God.
| |
| | Rom 15:8 | For Y seie, that Jhesu Crist was a mynystre of circumcisioun for the treuthe of God, to conferme the biheestis of fadris.
| |
| | Rom 15:9 | And hethene men owen to onoure God for merci; as it is writun, Therfor, Lord, Y schal knowleche to thee among hethene men, and Y schal synge to thi name.
| |
| | Rom 15:10 | And eft he seith, Ye hethene men, be ye glad with his puple.
| |
| | Rom 15:11 | And eft, Alle hethene men, herie ye the Lord; and alle puplis, magnefie ye hym.
| |
| | Rom 15:12 | And eft Isaie seith, Ther schal be a roote of Jesse, that schal rise vp to gouerne hethene men, and hethene men schulen hope in hym.
| |
| | Rom 15:13 | And God of hope fulfille you in al ioye and pees in bileuynge, that ye encrees in hope and vertu of the Hooli Goost.
| |
| | Rom 15:14 | And, britheren, Y my silf am certeyn of you, that also ye ben ful of loue, and ye ben fillid with al kunnyng, so that ye moun moneste ech other.
| |
| | Rom 15:15 | And, britheren, more boldli Y wroot to you a parti, as bryngynge you in to mynde, for the grace that is youun to me of God,
| |
| | Rom 15:16 | that Y be the mynystre of Crist Jhesu among hethene men. And Y halewe the gospel of God, that the offryng of hethene men be acceptid, and halewid in the Hooli Goost.
| |
| | Rom 15:17 | Therfor Y haue glorie in Crist Jhesu to God.
| |
| | Rom 15:18 | For Y dar not speke ony thing of tho thingis, whiche Crist doith not bi me, in to obedience of hethene men, in word and dedis,
| |
| | Rom 15:19 | in vertu of tokenes and grete wondris, in vertu of the Hooli Goost, so that fro Jerusalem bi cumpas to the Illirik see Y haue fillid the gospel of Crist.
| |
| | Rom 15:20 | And so Y haue prechid this gospel, not where Crist was named, lest Y bilde vpon anotheres ground, but as it is writun,
| |
| | Rom 15:21 | For to whom it is not teld of him, thei schulen se, and thei that herden not, schulen vndurstonde.
| |
| | Rom 15:22 | For which thing Y was lettid ful myche to come to you, and Y am lettid to this tyme.
| |
| | Rom 15:23 | And now Y haue not ferthere place in these cuntrees, but Y haue desire to come to you, of many yeris that ben passid.
| |
| | Rom 15:24 | Whanne Y bygynne to passe in to Spayne, Y hope that in my goyng Y schal se you, and of you Y schal be led thidur, if Y vse you first in parti.
| |
| | Rom 15:25 | Therfor now Y schal passe forth to Jerusalem, to mynystre to seyntis.
| |
| | Rom 15:26 | For Macedonye and Acaie han assaied to make sum yifte to pore men of seyntis, that ben in Jerusalem.
| |
| | Rom 15:27 | For it pleside to hem, and thei ben dettouris of hem; for hethene men ben maad parteneris of her goostli thingis, thei owen also in fleischli thingis to mynystre to hem.
| |
| | Rom 15:28 | Therfor whanne Y haue endid this thing, and haue asigned to hem this fruyt, Y schal passe bi you in to Spayne.
| |
| | Rom 15:29 | And Y woot, that Y comynge to you, schal come `in to the abundaunce of the blessing of Crist.
| |
| | Rom 15:30 | Therfor, britheren, Y biseche you bi oure Lord Jhesu Crist, and bi charite of the Hooli Goost, that ye helpe me in youre preyeris to the Lord,
| |
| | Rom 15:31 | that Y be delyuerid fro the vnfeithful men, that ben in Judee, and that the offryng of my seruyce be acceptid in Jerusalem to seyntis;
| |
| | Rom 15:32 | that Y come to you in ioye, bi the wille of God, and that Y be refreischid with you. And God of pees be with you alle. Amen.
| |
