| |
Wycliffe |   | |
 |
| |
| | Rom 11:1 | Therfor Y seie, Whether God hath put awei his puple? God forbede. For Y am an Israelite, of the seed of Abraham, of the lynage of Beniamyn.
| |
| | Rom 11:2 | God hath not put awei his puple, which he bifor knew. Whether ye witen not, what the scripture seith in Elie? Hou he preieth God ayens Israel,
| |
| | Rom 11:3 | Lord, thei han slayn thi prophetis, thei han vndurdoluun thin auteris, and Y am lefte aloone, and thei seken my lijf.
| |
| | Rom 11:4 | But what seith Goddis answere to hym? Y haue left to me seuene thousyndes of men, that han not bowid her knees bifore Baal.
| |
| | Rom 11:5 | So therfor also in this tyme, the relifs ben maad saaf, bi the chesyng of the grace of God.
| |
| | Rom 11:6 | And if it be bi the grace of God, it is not now of werkis; ellis grace is not now grace.
| |
| | Rom 11:7 | What thanne? Israel hath not getun this that he souyte, but eleccioun hath getun; and the othere ben blyndid.
| |
| | Rom 11:8 | As it is writun, God yaf to hem a spirit of compunccioun, iyen that thei se not, and eeris, that thei here not, in to this dai.
| |
| | Rom 11:9 | And Dauith seith, Be the boord of hem maad in to a gryn bifor hem, and in to catchyng, and in to sclaundre, and in to yeldyng to hem.
| |
| | Rom 11:10 | Be the iyen of hem maad derk, that thei se not; and bowe thou doun algatis the bak of hem.
| |
| | Rom 11:11 | Therfor Y seie, Whether thei offendiden so, that thei schulden falle doun? God forbede. But bi the gilt of hem helthe is maad to hethene men, that thei sue hem.
| |
| | Rom 11:12 | That if the gilt of hem ben richessis of the world, and the makyng lesse of hem ben richessis of hethene men, hou myche more the plente of hem?
| |
| | Rom 11:13 | But Y seie to you, hethene men, for as longe as Y am apostle of hethene men, Y schal onoure my mynysterie,
| |
| | Rom 11:14 | if in ony maner Y stire my fleisch for to folowe, and that Y make summe of hem saaf.
| |
| | Rom 11:15 | For if the loss of hem is the recouncelyng of the world, what is the takyng vp, but lijf of deede men?
| |
| | Rom 11:16 | For if a litil part of that that is tastid be hooli, the hool gobet is hooli; and if the roote is hooli, also the braunchis.
| |
| | Rom 11:17 | What if ony of the braunchis ben brokun, whanne thou were a wielde olyue tre, art graffid among hem, and art maad felowe of the roote, and of the fatnesse of the olyue tre,
| |
| | Rom 11:18 | nyle thou haue glorie ayens the braunchis. For if thou gloriest, thou berist not the roote, but the roote thee.
| |
| | Rom 11:19 | Therfor thou seist, The braunchis ben brokun, that Y be graffid in.
| |
| | Rom 11:20 | Wel, for vnbileue the braunchis ben brokun; but thou stondist bi feith. Nyle thou sauere hiye thing,
| |
| | Rom 11:21 | but drede thou, for if God sparide not the kyndli braunchis, lest perauenture he spare not thee.
| |
| | Rom 11:22 | Therfor se the goodnesse, and the fersnesse of God; yhe, the feersnesse in to hem that felden doun, but the goodnesse of God in to thee, if thou dwellist in goodnesse, ellis also thou schalt be kit doun.
| |
| | Rom 11:23 | Yhe, and thei schulen be set yn, if thei dwellen not in vnbileue. For God is myyti, to sette hem in eftsoone.
| |
| | Rom 11:24 | For if thou art kit doun of the kyndeli wielde olyue tre, and ayens kynd art set in to a good olyue tre, hou myche more thei that ben bi kynde, schulen be set in her olyue tree?
| |
| | Rom 11:25 | But, britheren, Y wole not that ye vnknowen this mysterie, that ye be not wise to you silf; for blyndenesse hath feld a parti in Israel, til that the plente of hethene men entride,
| |
| | Rom 11:26 | and so al Israel schulde be maad saaf. As it is writun, He schal come of Syon, that schal delyuere, and turne awei the wickidnesse of Jacob.
| |
| | Rom 11:27 | And this testament to hem of me, whanne Y schal do awei her synnes.
| |
| | Rom 11:28 | Aftir the gospel thei ben enemyes for you, but thei ben moost dereworthe bi the eleccioun for the fadris.
| |
| | Rom 11:29 | And the yiftis and the cleping of God ben with outen forthenkyng.
| |
| | Rom 11:30 | And as sum tyme also ye bileueden not to God, but now ye han gete mercy for the vnbileue of hem;
| |
| | Rom 11:31 | so and these now bileueden not in to youre merci, that also thei geten merci.
| |
| | Rom 11:32 | For God closide alle thingis togidere in vnbileue, that he haue mercy on alle.
| |
| | Rom 11:33 | O! the heiynesse of the ritchessis of the wisdom and of the kunnyng of God; hou incomprehensible ben hise domes, and hise weies ben vnserchable.
| |
| | Rom 11:34 | For whi who knew the wit of the Lord, or who was his counselour? or who formere yaf to hym,
| |
| | Rom 11:35 | and it schal be quyt to hym?
| |
| | Rom 11:36 | For of hym, and bi hym, and in hym ben alle thingis. To hym be glorie in to worldis. Amen.
| |
