				All NT OTBook
				Compare Texts

Mark 7:1-37

Wycliffe

Mar 7:1

And the Farisees and summe of the scribis camen fro Jerusalem togidir to hym.

Mar 7:2

And whanne thei hadden seen summe of hise disciplis ete breed with vnwaisschen hoondis, thei blameden.

Mar 7:3

The Farisees and alle the Jewis eten not, but thei waisschen ofte her hoondis, holdynge the tradiciouns of eldere men.

Mar 7:4

And whanne thei turnen ayen fro chepyng, thei eten not, but thei ben waisschen; and many other thingis ben, `that ben taken `to hem to kepe, wasschyngis of cuppis, and of watir vessels, and of vessels of bras, and of beddis.

Mar 7:5

And Farisees and scribis axiden hym, and seiden, Whi gon not thi disciplis aftir the tradicioun of eldere men, but with vnwasschen hondis thei eten breed?

Mar 7:6

And he answeride, and seide to hem, Ysaie prophesiede wel of you, ypocritis, as it is writun, This puple worschipith me with lippis, but her herte is fer fro me;

Mar 7:7

and in veyn thei worschipen me, techinge the doctrines and the heestis of men.

Mar 7:8

For ye leeuen the maundement of God, and holden the tradiciouns of men, wasschyngis of watir vessels, and of cuppis; and many othir thingis lijk to these ye doon.

Mar 7:9

And he seide to hem, Wel ye han maad the maundement of God voide, `to kepe youre tradicioun.

Mar 7:10

For Moyses seide, Worschipe thi fadir and thi modir; and he that cursith fadir or modir, die he by deeth.

Mar 7:11

But ye seien, If a man seie to fadir or modir, Corban, that is, What euer yifte is of me, it schal profite to thee;

Mar 7:12

and ouer ye suffren not hym do ony thing to fadir or modir,

Mar 7:13

and ye breken the word of God bi youre tradicioun, that ye han youun; and ye don many suche thingis.

Mar 7:14

And he eftsoone clepide the puple, and seide to hem, Ye alle here me, and vndurstonde.

Mar 7:15

No thing that is withouten a man, that entrith in to hym, may defoule him; but tho thingis that comen forth of a man, tho it ben that defoulen a man.

Mar 7:16

If ony man haue eeris of hering, here he.

Mar 7:17

And whanne he was entrid in to an hous, fro the puple, hise disciplis axiden hym the parable.

Mar 7:18

And he seide to hem, Ye ben vnwise also. Vndurstonde ye not, that al thing without forth that entreth in to a man, may not defoule hym?

Mar 7:19

for it hath not entrid in to his herte, but in to the wombe, and bynethe it goith out, purgynge alle metis.

Mar 7:20

But he seide, The thingis that gon out of a man, tho defoulen a man.

Mar 7:21

For fro with ynne, of the herte of men comen forth yuel thouytis, auowtries,

Mar 7:22

fornycaciouns, mansleyingis, theftis, auaricis, wickidnessis, gile, vnchastite, yuel iye, blasfemyes, pride, foli.

Mar 7:23

Alle these yuels comen forth fro with ynne, and defoulen a man.

Mar 7:24

And Jhesus roos vp fro thennus, and wente in to the coostis of Tyre and of Sidon. And he yede in to an hous, and wolde that no man wiste; and he myyte not be hid.

Mar 7:25

For a womman, anoon as sche herd of hym, whos douytir hadde an vnclene spirit, entride, and fel doun at hise feet.

Mar 7:26

And the womman was hethen, of the generacioun of Sirofenyce. And sche preiede hym, that he wolde caste out a deuel fro hir douyter.

Mar 7:27

And he seide to hir, Suffre thou, that the children be fulfillid first; for it is not good to take the breed of children, and yyue to houndis.

Mar 7:28

And sche answeride, and seide to him, Yis, Lord; for litil whelpis eten vndur the bord, of the crummes of children.

Mar 7:29

And Jhesus seide to hir, Go thou, for this word the feend wente out of thi douytir.

Mar 7:30

And whanne sche was gon in to hir hous home, sche foonde the damysel ligynge on the bed, and the deuel gon out fro hir.

Mar 7:31

And eftsoones Jhesus yede out fro the coostis of Tire, and cam thorou Sidon to the see of Galilee, bitwixe the myddil of the coostis of Decapoleos.

Mar 7:32

And thei bryngen to hym a man deef and doumbe, and preieden hym to leye his hoond on hym.

Mar 7:33

And he took hym asidis fro the puple, and puttide hise fyngris in to hise eris; and he spetide, and touchide his tonge.

Mar 7:34

And he bihelde in to heuene, and sorewide with ynne, and seide, Effeta, that is, Be thou openyd.

Mar 7:35

And anoon hise eris weren openyd, and the boond of his tunge was vnboundun, and he spak riytli.

Mar 7:36

And he comaundide to hem, that thei schulden seie to no man; but hou myche he comaundide to hem, so myche more thei prechiden,

Mar 7:37

and bi so myche more thei wondriden, and seiden, He dide wel alle thingis, and he made deef men to here, and doumbe men to speke.

Matthew \| Mark \| Luke \| John \| Acts \| Romans \| 1 Corinthians \| 2 Corinthians \| Galatians \| Ephesians \| Philippians \| Colossians \| 1 Thessalonians \| 2 Thessalonians \| 1 Timothy \| 2 Timothy \| Titus \| Philemon \| Hebrews \| James \| 1 Peter \| 2 Peter \| 1 John \| 2 John \| 3 John \| Jude \| Revelation
		1 2 3 4 5 6 7 8 9 10 11 12 13 14 15 16