| |
Wycliffe |   | |
 |
| |
| | Mar 15:1 | And anoon in the morewtid the hiyeste prestis maden a counsel with the elder men, and the scribis, and with al the counsel, and bounden Jhesu and ledden, and bitoken hym to Pilat.
| |
| | Mar 15:2 | And Pilat axide hym, Art thou kynge of Jewis? And Jhesus answeride, and seide to hym, Thou seist.
| |
| | Mar 15:3 | And the hieste prestis accusiden hym in many thingis.
| |
| | Mar 15:4 | But Pilat eftsoone axide hym, and seide, Answerist thou no thing? Seest thou in hou many thingis thei accusen thee?
| |
| | Mar 15:5 | But Jhesus answeride no more, so that Pilat wondride.
| |
| | Mar 15:6 | But bi the feeste dai he was wont to leeue to hem oon of men boundun, whom euer thei axiden.
| |
| | Mar 15:7 | And `oon ther was that was seid Barabas, that was boundun with men of dissencioun, that hadden don manslauytir in seducioun.
| |
| | Mar 15:8 | And whanne the puple was gon vp, he bigan to preie, as he euer more dide to hem.
| |
| | Mar 15:9 | And Pilat answeride `to hem, and seide, Wolen ye Y leeue to you the kyng of Jewis?
| |
| | Mar 15:10 | For he wiste, that the hiyeste prestis hadden takun hym bi enuye.
| |
| | Mar 15:11 | But the bischopis stireden the puple, that he schulde rather leeue to hem Barabas.
| |
| | Mar 15:12 | And eftsoone Pilat answerde, and seide to hem, What thanne wolen ye that Y schal do to the kyng of Jewis?
| |
| | Mar 15:13 | And thei eftsoone crieden, Crucifie hym.
| |
| | Mar 15:14 | But Pilat seide to hem, What yuel hath he don? And thei crieden the more, Crucifie hym.
| |
| | Mar 15:15 | And Pilat, willynge to make aseeth to the puple, lefte to hem Barabas, and bitok to hem Jhesu, betun with scourgis, to be crucified.
| |
| | Mar 15:16 | And knyytis ledden hym with ynneforth, in to the porche of the mote halle. And thei clepiden togidir al the cumpany of knyytis,
| |
| | Mar 15:17 | and clothiden hym with purpur. And thei writhen a coroun of thornes, and puttiden on hym.
| |
| | Mar 15:18 | And thei bigunnen to grete hym, and seiden, Heile, thou kyng of Jewis.
| |
| | Mar 15:19 | And thei smyten his heed with a reed, and bispatten hym; and thei kneliden, and worschipiden hym.
| |
| | Mar 15:20 | And aftir that thei hadden scorned him, thei vnclothiden hym of purpur, and clothiden hym with hise clothis, and ledden out hym, to crucifie hym.
| |
| | Mar 15:21 | And thei compelliden a man that passide the weie, that cam fro the toun, Symount of Syrenen, the fader of Alisaundir and of Rufe, to bere his cross.
| |
| | Mar 15:22 | And thei ledden hym in to a place Golgatha, that is to seie, the place of Caluari.
| |
| | Mar 15:23 | And thei yauen to hym to drynke wyn meddlid with mirre, and he took not.
| |
| | Mar 15:24 | And thei crucifieden him, and departiden hise clothis, and kesten lot on tho, who schulde take what.
| |
| | Mar 15:25 | And it was the thridde our, and thei crucifieden hym.
| |
| | Mar 15:26 | And the titil of his cause was writun, Kyng of Jewis.
| |
| | Mar 15:27 | And thei crucifien with hym twei theues, oon `at the riythalf and oon at his lefthalf.
| |
| | Mar 15:28 | And the scripture was fulfillid that seith, And he is ordeyned with wickid men.
| |
| | Mar 15:29 | And as thei passiden forth, thei blasfemyden hym, mouynge her heedis, and seiynge, Vath! thou that distriest the temple of God, and in `thre daies bildist it ayen;
| |
| | Mar 15:30 | come adoun fro the crosse, and make thi silf saaf.
| |
| | Mar 15:31 | Also the hiyeste prestis scorneden hym ech to othir with the scribis, and seiden, He made othir men saaf, he may not saue hym silf.
| |
| | Mar 15:32 | Crist, kyng of Israel, come doun now fro the cross, that we seen, and bileuen. And thei that weren crucified with hym, dispiseden hym.
| |
| | Mar 15:33 | And whanne the sixte hour was come, derknessis weren made on al the erthe til in to the nynthe our.
| |
| | Mar 15:34 | And in the nynthe our Jhesus criede with a greet vois, and seide, Heloy, Heloy, lamasabatany, that is to seie, My God, my God, whi hast thou forsakun me?
| |
| | Mar 15:35 | And summe of men that stoden aboute herden, and seiden, Lo! he clepith Helye.
| |
| | Mar 15:36 | And oon ranne, and fillide a spounge with vynegre, and puttide aboute to a reede, and yaf to hym drynke, and seide, Suffre ye, se we, if Helie come to do hym doun.
| |
| | Mar 15:37 | And Jhesus yaf out a greet cry, and diede.
| |
| | Mar 15:38 | And the veil of the temple was rent atwo fro the hiyeste to bynethe.
| |
| | Mar 15:39 | But the centurien that stood forn ayens siy, that he so criynge hadde diede, and seide, Verili, this man was Goddis sone.
| |
| | Mar 15:40 | And ther weren also wymmen biholdynge fro afer, among whiche was Marie Maudeleyn, and Marie, the modir of James the lesse, and of Joseph, and of Salome.
| |
| | Mar 15:41 | And whanne Jhesus was in Galilee, thei folewiden hym, and mynystriden to hym, and many othere wymmen, that camen vp togidir with him to Jerusalem.
| |
| | Mar 15:42 | And whanne euentid was come, for it was the euentid which is bifor the sabat,
| |
| | Mar 15:43 | Joseph of Armathie, the noble decurioun, cam, and he abood the rewme of God; and booldli he entride to Pilat, and axide the bodi of Jhesu.
| |
| | Mar 15:44 | But Pilat wondride, if he were now deed.
| |
| | Mar 15:45 | And whanne the centurion was clepid, he axide hym, if he were deed; and whanne he knewe of the centurion, he grauntide the bodi of Jhesu to Joseph.
| |
| | Mar 15:46 | And Joseph bouyte lynnen cloth, and took hym doun, and wlappide in the lynnen cloth, and leide hym in a sepulcre that was hewun of a stoon, and walewide a stoon to the dore of the sepulcre.
| |
| | Mar 15:47 | And Marie Maudeleyne and Marie of Joseph bihelden, where he was leid.
| |
