| |
Hebrew Old Testament |   | |
 |
| |
| | ותאמר לה נעמי חמותה בתי הלא אבקש-לך מנוח אשר ייטב-לך.
| Rth 3:1 | |
| | ועתה הלא בעז מדעתנו אשר היית את-נערותיו הנה-הוא זרה את-גרן השערים הלילה.
| Rth 3:2 | |
| | ורחצת וסכת ושמת שמלתך עליך וירדתי הגרן אל-תודעי לאיש עד כלתו לאכל ולשתות.
| Rth 3:3 | |
| | ויהי בשכבו וידעת את-המקום אשר ישכב-שם ובאת וגלית מרגלתיו ושכבתי והוא יגיד לך את אשר תעשין.
| Rth 3:4 | |
| | ותאמר אליה כל אשר-תאמרי אעשה.
| Rth 3:5 | |
| | ותרד הגרן ותעש ככל אשר-צותה חמותה.
| Rth 3:6 | |
| | ויאכל בעז וישת וייטב לבו ויבא לשכב בקצה הערמה ותבא בלט ותגל מרגלתיו ותשכב.
| Rth 3:7 | |
| | ויהי בחצי הלילה ויחרד האיש וילפת והנה אשה שכבת מרגלתיו.
| Rth 3:8 | |
| | ויאמר מי-את ותאמר אנכי רות אמתך ופרשת כנפך על-אמתך כי גאל אתה.
| Rth 3:9 | |
| | ויאמר ברוכה את ליהוה בתי היטבת חסדך האחרון מן-הראשון לבלתי- לכת אחרי הבחורים אם-דל ואם-עשיר.
| Rth 3:10 | |
| | ועתה בתי אל-תיראי כל אשר-תאמרי אעשה-לך כי יודע כל-שער עמי כי אשת חיל את.
| Rth 3:11 | |
| | ועתה כי אמנם כי אם גאל אנכי וגם יש גאל קרוב ממני.
| Rth 3:12 | |
| | ליני הלילה והיה בבקר אם-יגאלך טוב יגאל ואם-לא יחפץ לגאלך וגאלתיך אנכי חי-יהוה שכבי עד-הבקר.
| Rth 3:13 | |
| | ותשכב מרגלתו עד-הבקר ותקם בטרום יכיר איש את-רעהו ויאמר אל- יודע כי-באה האשה הגרן.
| Rth 3:14 | |
| | ויאמר הבי המטפחת אשר-עליך ואחזי-בה ותאחז בה וימד שש-שערים וישת עליה ויבא העיר.
| Rth 3:15 | |
| | ותבוא אל-חמותה ותאמר מי-את בתי ותגד-לה את כל-אשר עשה-לה האיש.
| Rth 3:16 | |
| | ותאמר שש-השערים האלה נתן לי כי אמר אל-תבואי ריקם אל-חמותך.
| Rth 3:17 | |
| | ותאמר שבי בתי עד אשר תדעין איך יפל דבר כי לא ישקט האיש כי-אם- כלה הדבר היום.
| Rth 3:18 | |
