| |
Hebrew Old Testament |   | |
 |
| |
| | אל-תשמח ישראל אל-גיל כעמים כי זנית מעל אלהיך אהבת אתנן על כל- גרנות דגן.
| Hsa 9:1 | |
| | גרן ויקב לא ירעם ותירוש יכחש בה.
| Hsa 9:2 | |
| | לא ישבו בארץ יהוה ושב אפרים מצרים ובאשור טמא יאכלו.
| Hsa 9:3 | |
| | לא-יסכו ליהוה יין ולא יערבו-לו זבחיהם כלחם אונים להם כל-אכליו יטמאו כי-לחמם לנפשם לא יבוא בית יהוה.
| Hsa 9:4 | |
| | מה-תעשו ליום מועד וליום חג-יהוה.
| Hsa 9:5 | |
| | כי-הנה הלכו משד מצרים תקבצם מף תקברם מחמד לכספם קמוש יירשם חוח באהליהם.
| Hsa 9:6 | |
| | באו ימי הפקדה באו ימי השלם ידעו ישראל אויל הנביא משגע איש הרוח על רב עונך ורבה משטמה.
| Hsa 9:7 | |
| | צפה אפרים עם-אלהי נביא פח יקוש על-כל-דרכיו משטמה בבית אלהיו.
| Hsa 9:8 | |
| | העמיקו-שחתו כימי הגבעה יזכור עונם יפקוד חטאותם.
| Hsa 9:9 | |
| | כענבים במדבר מצאתי ישראל כבכורה בתאנה בראשיתה ראיתי אבותיכם המה באו בעל-פעור וינזרו לבשת ויהיו שקוצים כאהבם.
| Hsa 9:10 | |
| | אפרים כעוף יתעופף כבודם מלדה ומבטן ומהריון.
| Hsa 9:11 | |
| | כי אם-יגדלו את-בניהם ושכלתים מאדם כי-גם-אוי להם בשורי מהם.
| Hsa 9:12 | |
| | אפרים כאשר-ראיתי לצור שתולה בנוה ואפרים להוציא אל-הרג בניו.
| Hsa 9:13 | |
| | תן-להם יהוה מה-תתן תן-להם רחם משכיל ושדים צמקים.
| Hsa 9:14 | |
| | כל-רעתם בגלגל כי-שם שנאתים על רע מעלליהם מביתי אגרשם לא אוסף אהבתם כל-שריהם סררים.
| Hsa 9:15 | |
| | הכה אפרים שרשם יבש פרי בלי-יעשון גם כי ילדון והמתי מחמדי בטנם.
| Hsa 9:16 | |
| | ימאסם אלהי כי לא שמעו לו ויהיו נדדים בגוים.
| Hsa 9:17 | |
