| |
Hebrew Old Testament |   | |
 |
| |
| | והיה מספר בני-ישראל כחול הים אשר לא-ימד ולא יספר והיה במקום אשר-יאמר להם לא-עמי אתם יאמר להם בני אל-חי.
| Hsa 2:1 | |
| | ונקבצו בני-יהודה ובני-ישראל יחדו ושמו להם ראש אחד ועלו מן- הארץ כי גדול יום יזרעאל.
| Hsa 2:2 | |
| | אמרו לאחיכם עמי ולאחותיכם רחמה.
| Hsa 2:3 | |
| | ריבו באמכם ריבו כי-היא לא אשתי ואנכי לא אישה ותסר זנוניה מפניה ונאפופיה מבין שדיה.
| Hsa 2:4 | |
| | פן-אפשיטנה ערמה והצגתיה כיום הולדה ושמתיה כמדבר ושתה כארץ ציה והמתיה בצמא.
| Hsa 2:5 | |
| | ואת-בניה לא ארחם כי-בני זנונים המה.
| Hsa 2:6 | |
| | כי זנתה אמם הבישה הורתם כי אמרה אלכה אחרי מאהבי נתני לחמי ומימי צמרי ופשתי שמני ושקויי.
| Hsa 2:7 | |
| | לכן הנני-שך את-דרכך בסירים וגדרתי את-גדרה ונתיבותיה לא תמצא.
| Hsa 2:8 | |
| | ורדפה את-מאהביה ולא-תשיג אתם ובקשתם ולא תמצא ואמרה אלכה ואשובה אל-אישי הראשון כי טוב לי אז מעתה.
| Hsa 2:9 | |
| | והיא לא ידעה כי אנכי נתתי לה הדגן והתירוש והיצהר וכסף הרביתי לה וזהב עשו לבעל.
| Hsa 2:10 | |
| | לכן אשוב ולקחתי דגני בעתו ותירושי במועדו והצלתי צמרי ופשתי לכסות את-ערותה.
| Hsa 2:11 | |
| | ועתה אגלה את-נבלתה לעיני מאהביה ואיש לא-יצילנה מידי.
| Hsa 2:12 | |
| | והשבתי כל-משושה חגה חדשה ושבתה וכל מועדה.
| Hsa 2:13 | |
| | והשמתי גפנה ותאנתה אשר אמרה אתנה המה לי אשר נתנו-לי מאהבי ושמתים ליער ואכלתם חית השדה.
| Hsa 2:14 | |
| | ופקדתי עליה את-ימי הבעלים אשר תקטיר להם ותעד נזמה וחליתה ותלך אחרי מאהביה ואתי שכחה נאם-יהוה.
| Hsa 2:15 | |
| | לכן הנה אנכי מפתיה והלכתיה המדבר ודברתי על-לבה.
| Hsa 2:16 | |
| | ונתתי לה את-כרמיה משם ואת-עמק עכור לפתח תקוה וענתה שמה כימי נעוריה וכיום עלתה מארץ-מצרים.
| Hsa 2:17 | |
| | והיה ביום-ההוא נאם-יהוה תקראי אישי ולא-תקראי-לי עוד בעלי.
| Hsa 2:18 | |
| | והסרתי את-שמות הבעלים מפיה ולא-יזכרו עוד בשמם.
| Hsa 2:19 | |
| | וכרתי להם ברית ביום ההוא עם-חית השדה ועם-עוף השמים ורמש האדמה וקשת וחרב ומלחמה אשבור מן-הארץ והשכבתים לבטח.
| Hsa 2:20 | |
| | וארשתיך לי לעולם וארשתיך לי בצדק ובמשפט ובחסד וברחמים.
| Hsa 2:21 | |
| | וארשתיך לי באמונה וידעת את-יהוה.
| Hsa 2:22 | |
| | והיה ביום ההוא אענה נאם-יהוה אענה את-השמים והם יענו את-הארץ.
| Hsa 2:23 | |
| | והארץ תענה את-הדגן ואת-התירוש ואת-היצהר והם יענו את-יזרעאל.
| Hsa 2:24 | |
| | וזרעתיה לי בארץ ורחמתי את-לא רחמה ואמרתי ללא-עמי עמי-אתה והוא יאמר אלהי.
| Hsa 2:25 | |
