| |
Hebrew Old Testament |   | |
 |
| |
| | ואחר באו משה ואהרן ויאמרו אל-פרעה כה-אמר יהוה אלהי ישראל שלח את-עמי ויחגו לי במדבר.
| Exd 5:1 | |
| | ויאמר פרעה מי יהוה אשר אשמע בקלו לשלח את-ישראל לא ידעתי את- יהוה וגם את-ישראל לא אשלח.
| Exd 5:2 | |
| | ויאמרו אלהי העברים נקרא עלינו נלכה נא דרך שלשת ימים במדבר ונזבחה ליהוה אלהינו פן-יפגענו בדבר או בחרב.
| Exd 5:3 | |
| | ויאמר אלהם מלך מצרים למה משה ואהרן תפריעו את-העם ממעשיו לכו לסבלתיכם.
| Exd 5:4 | |
| | ויאמר פרעה הן-רבים עתה עם הארץ והשבתם אתם מסבלתם.
| Exd 5:5 | |
| | ויצו פרעה ביום ההוא את-הנגשים בעם ואת-שטריו לאמר.
| Exd 5:6 | |
| | לא תאספון לתת תבן לעם ללבן הלבנים כתמול שלשם הם ילכו וקששו להם תבן.
| Exd 5:7 | |
| | ואת-מתכנת הלבנים אשר הם עשים תמול שלשם תשימו עליהם לא תגרעו ממנו כי-נרפים הם על-כן הם צעקים לאמר נלכה נזבחה לאלהינו.
| Exd 5:8 | |
| | תכבד העבדה על-האנשים ויעשו-בה ואל-ישעו בדברי-שקר.
| Exd 5:9 | |
| | ויצאו נגשי העם ושטריו ויאמרו אל-העם לאמר כה אמר פרעה אינני נתן לכם תבן.
| Exd 5:10 | |
| | אתם לכו קחו לכם תבן מאשר תמצאו כי אין נגרע מעבדתכם דבר.
| Exd 5:11 | |
| | ויפץ העם בכל-ארץ מצרים לקשש קש לתבן.
| Exd 5:12 | |
| | והנגשים אצים לאמר כלו מעשיכם דבר-יום ביומו כאשר בהיות התבן.
| Exd 5:13 | |
| | ויכו שטרי בני ישראל אשר-שמו עלהם נגשי פרעה לאמר מדוע לא כליתם חקכם ללבן כתמול שלשם גם-תמול גם-היום.
| Exd 5:14 | |
| | ויבאו שטרי בני ישראל ויצעקו אל-פרעה לאמר למה תעשה כה לעבדיך.
| Exd 5:15 | |
| | תבן אין נתן לעבדיך ולבנים אמרים לנו עשו והנה עבדיך מכים וחטאת עמך.
| Exd 5:16 | |
| | ויאמר נרפים אתם נרפים על-כן אתם אמרים נלכה נזבחה ליהוה.
| Exd 5:17 | |
| | ועתה לכו עבדו ותבן לא-ינתן לכם ותכן לבנים תתנו.
| Exd 5:18 | |
| | ויראו שטרי בני-ישראל אתם ברע לאמר לא-תגרעו מלבניכם דבר-יום ביומו.
| Exd 5:19 | |
| | ויפגעו את-משה ואת-אהרן נצבים לקראתם בצאתם מאת פרעה.
| Exd 5:20 | |
| | ויאמרו אלהם ירא יהוה עליכם וישפט אשר הבאשתם את-ריחנו בעיני פרעה ובעיני עבדיו לתת-חרב בידם להרגנו.
| Exd 5:21 | |
| | וישב משה אל-יהוה ויאמר אדני למה הרעתה לעם הזה למה זה שלחתני.
| Exd 5:22 | |
| | ומאז באתי אל-פרעה לדבר בשמך הרע לעם הזה והצל לא-הצלת את-עמך.
| Exd 5:23 | |
