| |
Hebrew Old Testament |   | |
 |
| |
| | ומן-התכלת והארגמן ותולעת השני עשו בגדי-שרד לשרת בקדש ויעשו את- בגדי הקדש אשר לאהרן כאשר צוה יהוה את-משה.
| Exd 39:1 | |
| | ויעש את-האפד זהב תכלת וארגמן ותולעת שני ושש משזר.
| Exd 39:2 | |
| | וירקעו את-פחי הזהב וקצץ פתילם לעשות בתוך התכלת ובתוך הארגמן ובתוך תולעת השני ובתוך השש מעשה חשב.
| Exd 39:3 | |
| | כתפת עשו-לו חברת על-שני קצוותו חבר.
| Exd 39:4 | |
| | וחשב אפדתו אשר עליו ממנו הוא כמעשהו זהב תכלת וארגמן ותולעת שני ושש משזר כאשר צוה יהוה את-משה.
| Exd 39:5 | |
| | ויעשו את-אבני השהם מסבת משבצת זהב מפתחת פתוחי חותם על-שמות בני ישראל.
| Exd 39:6 | |
| | וישם אתם על כתפת האפד אבני זכרון לבני ישראל כאשר צוה יהוה את- משה.
| Exd 39:7 | |
| | ויעש את-החשן מעשה חשב כמעשה אפד זהב תכלת וארגמן ותולעת שני ושש משזר.
| Exd 39:8 | |
| | רבוע היה כפול עשו את-החשן זרת ארכו וזרת רחבו כפול.
| Exd 39:9 | |
| | וימלאו-בו ארבעה טורי אבן טור אדם פטדה וברקת הטור האחד.
| Exd 39:10 | |
| | והטור השני נפך ספיר ויהלם.
| Exd 39:11 | |
| | והטור השלישי לשם שבו ואחלמה.
| Exd 39:12 | |
| | והטור הרביעי תרשיש שהם וישפה מוסבת משבצת זהב במלאתם.
| Exd 39:13 | |
| | והאבנים על-שמת בני-ישראל הנה שתים עשרה על-שמתם פתוחי חתם איש על-שמו לשנים עשר שבט.
| Exd 39:14 | |
| | ויעשו על-החשן שרשרת גבלת מעשה עבת זהב טהור.
| Exd 39:15 | |
| | ויעשו שתי משבצת זהב ושתי טבעת זהב ויתנו את-שתי הטבעת על-שני קצות החשן.
| Exd 39:16 | |
| | ויתנו שתי העבתת הזהב על-שתי הטבעת על-קצות החשן.
| Exd 39:17 | |
| | ואת שתי קצות שתי העבתת נתנו על-שתי המשבצת ויתנם על-כתפת האפד אל-מול פניו.
| Exd 39:18 | |
| | ויעשו שתי טבעת זהב וישימו על-שני קצות החשן על-שפתו אשר אל- עבר האפד ביתה.
| Exd 39:19 | |
| | ויעשו שתי טבעת זהב ויתנם על-שתי כתפת האפד מלמטה ממול פניו לעמת מחברתו ממעל לחשב האפד.
| Exd 39:20 | |
| | וירכסו את-החשן מטבעתיו אל-טבעת האפד בפתיל תכלת להית על-חשב האפד ולא-יזח החשן מעל האפד כאשר צוה יהוה את-משה.
| Exd 39:21 | |
| | ויעש את-מעיל האפד מעשה ארג כליל תכלת.
| Exd 39:22 | |
| | ופי-המעיל בתוכו כפי תחרא שפה לפיו סביב לא יקרע.
| Exd 39:23 | |
| | ויעשו על-שולי המעיל רמוני תכלת וארגמן ותולעת שני משזר.
| Exd 39:24 | |
| | ויעשו פעמני זהב טהור ויתנו את-הפעמנים בתוך הרמנים על-שולי המעיל סביב בתוך הרמנים.
| Exd 39:25 | |
| | פעמן ורמן פעמן ורמן על-שולי המעיל סביב לשרת כאשר צוה יהוה את- משה.
| Exd 39:26 | |
| | ויעשו את-הכתנת שש מעשה ארג לאהרן ולבניו.
| Exd 39:27 | |
| | ואת המצנפת שש ואת-פארי המגבעת שש ואת-מכנסי הבד שש משזר.
| Exd 39:28 | |
| | ואת-האבנט שש משזר ותכלת וארגמן ותולעת שני מעשה רקם כאשר צוה יהוה את-משה.
| Exd 39:29 | |
| | ויעשו את-ציץ נזר-הקדש זהב טהור ויכתבו עליו מכתב פתוחי חותם קדש ליהוה.
| Exd 39:30 | |
| | ויתנו עליו פתיל תכלת לתת על-המצנפת מלמעלה כאשר צוה יהוה את- משה.
| Exd 39:31 | |
| | ותכל כל-עבדת משכן אהל מועד ויעשו בני ישראל ככל אשר צוה יהוה את-משה כן עשו.
| Exd 39:32 | |
| | ויביאו את-המשכן אל-משה את-האהל ואת-כל-כליו קרסיו קרשיו בריחו ועמדיו ואדניו.
| Exd 39:33 | |
| | ואת-מכסה עורת האילם המאדמים ואת-מכסה ערת התחשים ואת פרכת המסך.
| Exd 39:34 | |
| | את-ארון העדת ואת-בדיו ואת הכפרת.
| Exd 39:35 | |
| | את-השלחן את-כל-כליו ואת לחם הפנים.
| Exd 39:36 | |
| | את-המנרה הטהרה את-נרתיה נרת המערכה ואת-כל-כליה ואת שמן המאור.
| Exd 39:37 | |
| | ואת מזבח הזהב ואת שמן המשחה ואת קטרת הסמים ואת מסך פתח האהל.
| Exd 39:38 | |
| | את מזבח הנחשת ואת-מכבר הנחשת אשר-לו את-בדיו ואת-כל-כליו את- הכיר ואת-כנו.
| Exd 39:39 | |
| | את קלעי החצר את-עמדיה ואת-אדניה ואת-המסך לשער החצר את-מיתריו ויתדתיה ואת כל-כלי עבדת המשכן לאהל מועד.
| Exd 39:40 | |
| | את-בגדי השרד לשרת בקדש את-בגדי הקדש לאהרן הכהן ואת-בגדי בניו lkdo.
| Exd 39:41 | |
| | ככל אשר-צוה יהוה את-משה כן עשו בני ישראל את כל-העבדה.
| Exd 39:42 | |
| | וירא משה את-כל-המלאכה והנה עשו אתה כאשר צוה יהוה כן עשו ויברך אתם משה.
| Exd 39:43 | |
