| |
Hebrew Old Testament |   | |
 |
| |
| | ויעש את-מזבח העלה עצי שטים חמש אמות ארכו וחמש-אמות רחבו רבוע ושלש אמות קמתו.
| Exd 38:1 | |
| | ויעש קרנתיו על ארבע פנתיו ממנו היו קרנתיו ויצף אתו נחשת.
| Exd 38:2 | |
| | ויעש את-כל-כלי המזבח את-הסירת ואת-היעים ואת-המזרקת את-המזלגת ואת-המחתת כל-כליו עשה נחשת.
| Exd 38:3 | |
| | ויעש למזבח מכבר מעשה רשת נחשת תחת כרכבו מלמטה עד-חציו.
| Exd 38:4 | |
| | ויצק ארבע טבעת בארבע הקצות למכבר הנחשת בתים לבדים.
| Exd 38:5 | |
| | ויעש את-הבדים עצי שטים ויצף אתם נחשת.
| Exd 38:6 | |
| | ויבא את-הבדים בטבעת על צלעת המזבח לשאת אתו בהם נבוב לחת עשה אתו.
| Exd 38:7 | |
| | ויעש את הכיור נחשת ואת כנו נחשת במראת הצבאת אשר צבאו פתח אהל מועד.
| Exd 38:8 | |
| | ויעש את-החצר לפאת נגב תימנה קלעי החצר שש משזר מאה באמה.
| Exd 38:9 | |
| | עמודיהם עשרים ואדניהם עשרים נחשת ווי העמודים וחשקיהם כסף.
| Exd 38:10 | |
| | ולפאת צפון מאה באמה עמודיהם עשרים ואדניהם עשרים נחשת ווי העמודים וחשקיהם כסף.
| Exd 38:11 | |
| | ולפאת-ים קלעים חמשים באמה עמודיהם עשרה ואדניהם עשרה ווי העמדים וחשוקיהם כסף.
| Exd 38:12 | |
| | ולפאת קדמה מזרחה חמשים אמה.
| Exd 38:13 | |
| | קלעים חמש-עשרה אמה אל-הכתף עמודיהם שלשה ואדניהם שלשה.
| Exd 38:14 | |
| | ולכתף השנית מזה ומזה לשער החצר קלעים חמש עשרה אמה עמדיהם שלשה ואדניהם שלשה.
| Exd 38:15 | |
| | כל-קלעי החצר סביב שש משזר.
| Exd 38:16 | |
| | והאדנים לעמדים נחשת ווי העמודים וחשוקיהם כסף וצפוי ראשיהם כסף והם מחשקים כסף כל עמדי החצר.
| Exd 38:17 | |
| | ומסך שער החצר מעשה רקם תכלת וארגמן ותולעת שני ושש משזר ועשרים אמה ארך וקומה ברחב חמש אמות לעמת קלעי החצר.
| Exd 38:18 | |
| | ועמדיהם ארבעה ואדניהם ארבעה נחשת וויהם כסף וצפוי ראשיהם וחשקיהם כסף.
| Exd 38:19 | |
| | וכל-היתדת למשכן ולחצר סביב נחשת.
| Exd 38:20 | |
| | אלה פקודי המשכן משכן העדת אשר פקד על-פי משה עבדת הלוים ביד איתמר בן-אהרן הכהן.
| Exd 38:21 | |
| | ובצלאל בן-אורי בן-חור למטה יהודה עשה את כל-אשר-צוה יהוה את- משה.
| Exd 38:22 | |
| | ואתו אהליאב בן-אחיסמך למטה-דן חרש וחשב ורקם בתכלת ובארגמן ובתולעת השני ובשש.
| Exd 38:23 | |
| | כל-הזהב העשוי למלאכה בכל מלאכת הקדש ויהי זהב התנופה תשע ועשרים ככר ושבע מאות ושלשים שקל בשקל הקדש.
| Exd 38:24 | |
| | וכסף פקודי העדה מאת ככר ואלף ושבע מאות וחמשה ושבעים שקל בשקל הקדש.
| Exd 38:25 | |
| | בקע לגלגלת מחצית השקל בשקל הקדש לכל העבר על-הפקדים מבן עשרים שנה ומעלה לשש-מאות אלף ושלשת אלפים וחמש מאות וחמשים.
| Exd 38:26 | |
| | ויהי מאת ככר הכסף לצקת את אדני הקדש ואת אדני הפרכת מאת אדנים למאת הככר ככר לאדן.
| Exd 38:27 | |
| | ואת-האלף ושבע המאות וחמשה ושבעים עשה ווים לעמודים וצפה ראשיהם וחשק אתם.
| Exd 38:28 | |
| | ונחשת התנופה שבעים ככר ואלפים וארבע-מאות שקל.
| Exd 38:29 | |
| | ויעש בה את-אדני פתח אהל מועד ואת מזבח הנחשת ואת-מכבר הנחשת אשר-לו ואת כל-כלי המזבח.
| Exd 38:30 | |
| | ואת-אדני החצר סביב ואת-אדני שער החצר ואת כל-יתדת המשכן ואת- כל-יתדת החצר סביב.
| Exd 38:31 | |
