All NT OTBook
Compare Texts
Genesis 1 Exodus 34

Exodus 35:1-35

Exodus 36 Leviticus 1

Hebrew Old Testament

 
 
 ויקהל משה את-כל-עדת בני ישראל ויאמר אלהם אלה הדברים אשר-צוה יהוה לעשת אתם.  
Exd 35:1
 
 ששת ימים תעשה מלאכה וביום השביעי יהיה לכם קדש שבת שבתון ליהוה כל-העשה בו מלאכה יומת.  
Exd 35:2
 
 לא-תבערו אש בכל משבתיכם ביום השבת.  
Exd 35:3
 
 ויאמר משה אל-כל-עדת בני-ישראל לאמר זה הדבר אשר-צוה יהוה לאמר.  
Exd 35:4
 
 קחו מאתכם תרומה ליהוה כל נדיב לבו יביאה את תרומת יהוה זהב וכסף ונחשת.  
Exd 35:5
 
 ותכלת וארגמן ותולעת שני ושש ועזים.  
Exd 35:6
 
 וערת אילם מאדמים וערת תחשים ועצי שטים.  
Exd 35:7
 
 ושמן למאור ובשמים לשמן המשחה ולקטרת הסמים.  
Exd 35:8
 
 ואבני-שהם ואבני מלאים לאפוד ולחשן.  
Exd 35:9
 
 וכל-חכם-לב בכם יבאו ויעשו את כל-אשר צוה יהוה.  
Exd 35:10
 
 את-המשכן את-אהלו ואת-מכסהו את-קרסיו ואת-קרשיו את-בריחו את- עמדיו ואת-אדניו.  
Exd 35:11
 
 את-הארן ואת-בדיו את-הכפרת ואת פרכת המסך.  
Exd 35:12
 
 את-השלחן ואת-בדיו ואת-כל-כליו ואת לחם הפנים.  
Exd 35:13
 
 ואת-מנרת המאור ואת-כליה ואת-נרתיה ואת שמן המאור.  
Exd 35:14
 
 ואת-מזבח הקטרת ואת-בדיו ואת שמן המשחה ואת קטרת הסמים ואת-מסך הפתח לפתח המשכן.  
Exd 35:15
 
 את מזבח העלה ואת-מכבר הנחשת אשר-לו את-בדיו ואת-כל-כליו את- הכיר ואת-כנו.  
Exd 35:16
 
 את קלעי החצר את-עמדיו ואת-אדניה ואת מסך שער החצר.  
Exd 35:17
 
 את-יתדת המשכן ואת-יתדת החצר ואת-מיתריהם.  
Exd 35:18
 
 את-בגדי השרד לשרת בקדש את-בגדי הקדש לאהרן הכהן ואת-בגדי בניו לכהן.  
Exd 35:19
 
 ויצאו כל-עדת בני-ישראל מלפני משה.  
Exd 35:20
 
 ויבאו כל-איש אשר-נשאו לבו וכל אשר נדבה רוחו אתו הביאו את- תרומת יהוה למלאכת אהל מועד ולכל-עבדתו ולבגדי הקדש.  
Exd 35:21
 
 ויבאו האנשים על-הנשים כל נדיב לב הביאו חח ונזם וטבעת וכומז כל-כלי זהב וכל-איש אשר הניף תנופת זהב ליהוה.  
Exd 35:22
 
 וכל-איש אשר-נמצא אתו תכלת וארגמן ותולעת שני ושש ועזים וערת אילם מאדמים וערת תחשים הביאו.  
Exd 35:23
 
 כל-מרים תרומת כסף ונחשת הביאו את תרומת יהוה וכל אשר נמצא אתו עצי שטים לכל-מלאכת העבדה הביאו.  
Exd 35:24
 
 וכל-אשה חכמת-לב בידיה טוו ויביאו מטוה את-התכלת ואת-הארגמן את- תולעת השני ואת-השש.  
Exd 35:25
 
 וכל-הנשים אשר נשא לבן אתנה בחכמה טוו את-העזים.  
Exd 35:26
 
 והנשאם הביאו את אבני השהם ואת אבני המלאים לאפוד ולחשן.  
Exd 35:27
 
 ואת-הבשם ואת-השמן למאור ולשמן המשחה ולקטרת הסמים.  
Exd 35:28
 
 כל-איש ואשה אשר נדב לבם אתם להביא לכל-המלאכה אשר צוה יהוה לעשות ביד-משה הביאו בני-ישראל נדבה ליהוה.  
Exd 35:29
 
 ויאמר משה אל-בני ישראל ראו קרא יהוה בשם בצלאל בן-אורי בן-חור למטה יהודה.  
Exd 35:30
 
 וימלא אתו רוח אלהים בחכמה בתבונה ובדעת ובכל-מלאכה.  
Exd 35:31
 
 ולחשב מחשבת לעשת בזהב ובכסף ובנחשת.  
Exd 35:32
 
 ובחרשת אבן למלאת ובחרשת עץ לעשות בכל-מלאכת מחשבת.  
Exd 35:33
 
 ולהורת נתן בלבו הוא ואהליאב בן-אחיסמך למטה-דן.  
Exd 35:34
 
 מלא אתם חכמת-לב לעשות כל-מלאכת חרש וחשב ורקם בתכלת ובארגמן בתולעת השני ובשש וארג עשי כל-מלאכה וחשבי מחשבת.  
Exd 35:35
 

Genesis | Exodus | Leviticus | Numbers | Deuteronomy | Joshua | Judges | Ruth | 1 Samuel | 2 Samuel | 1 Kings | 2 Kings | 1 Chronicles | 2 Chronicles | Ezra | Nehemiah | Esther | Job | Psalms | Proverbs | Ecclesiastes | Song of Solomon | Isaiah | Jeremiah | Lamentations | Ezekiel | Daniel | Hosea | Joel | Amos | Obadiah | Jonah | Micah | Nahum | Habakkuk | Zephaniah | Haggai | Zechariah | Malachi
Genesis 1Exodus 346 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 Exodus 36Leviticus 1
© 2005 redegg.org Home | Bible | About | Help | Site Map | Violin Flash Cards