| |
Hebrew Old Testament |   | |
 |
| |
| | ויאמר יהוה אל-משה פסל-לך שני-לחת אבנים כראשנים וכתבתי על-הלחת את-הדברים אשר היו על-הלחת הראשנים אשר שברת.
| Exd 34:1 | |
| | והיה נכון לבקר ועלית בבקר אל-הר סיני ונצבת לי שם על-ראש ההר.
| Exd 34:2 | |
| | ואיש לא-יעלה עמך וגם-איש אל-ירא בכל-ההר גם-הצאן והבקר אל-ירעו אל-מול ההר ההוא.
| Exd 34:3 | |
| | ויפסל שני-לחת אבנים כראשנים וישכם משה בבקר ויעל אל-הר סיני כאשר צוה יהוה אתו ויקח בידו שני לחת אבנים.
| Exd 34:4 | |
| | וירד יהוה בענן ויתיצב עמו שם ויקרא בשם יהוה.
| Exd 34:5 | |
| | ויעבר יהוה על-פניו ויקרא יהוה יהוה אל רחום וחנון ארך אפים ורב- חסד ואמת.
| Exd 34:6 | |
| | נצר חסד לאלפים נשא עון ופשע וחטאה ונקה לא ינקה פקד עון אבות על-בנים ועל-בני בנים על-שלשים ועל-רבעים.
| Exd 34:7 | |
| | וימהר משה ויקד ארצה וישתחו.
| Exd 34:8 | |
| | ויאמר אם-נא מצאתי חן בעיניך אדני ילך-נא אדני בקרבנו כי עם-קשה- ערף הוא וסלחת לעוננו ולחטאתנו ונחלתנו.
| Exd 34:9 | |
| | ויאמר הנה אנכי כרת ברית נגד כל-עמך אעשה נפלאת אשר לא-נבראו בכל-הארץ ובכל-הגוים וראה כל-העם אשר-אתה בקרבו את-מעשה יהוה כי- נורא הוא אשר אני עשה עמך.
| Exd 34:10 | |
| | שמר-לך את אשר אנכי מצוך היום הנני גרש מפניך את-האמרי והכנעני והחתי והפרזי והחוי והיבוסי.
| Exd 34:11 | |
| | השמר לך פן-תכרת ברית ליושב הארץ אשר אתה בא עליה פן-יהיה למוקש בקרבך.
| Exd 34:12 | |
| | כי את-מזבחתם תתצון ואת-מצבתם תשברון ואת-אשריו תכרתון.
| Exd 34:13 | |
| | כי לא תשתחוה לאל אחר כי יהוה קנא שמו אל קנא הוא.
| Exd 34:14 | |
| | פן-תכרת ברית ליושב הארץ וזנו אחרי אלהיהם וזבחו לאלהיהם וקרא לך ואכלת מזבחו.
| Exd 34:15 | |
| | ולקחת מבנתיו לבניך וזנו בנתיו אחרי אלהיהן והזנו את-בניך אחרי אלהיהן.
| Exd 34:16 | |
| | אלהי מסכה לא תעשה-לך.
| Exd 34:17 | |
| | את-חג המצות תשמר שבעת ימים תאכל מצות אשר צויתך למועד חדש האביב כי בחדש האביב יצאת ממצרים.
| Exd 34:18 | |
| | כל-פטר רחם לי וכל-מקנך תזכר פטר שור ושה.
| Exd 34:19 | |
| | ופטר חמור תפדה בשה ואם-לא תפדה וערפתו כל בכור בניך תפדה ולא- יראו פני ריקם.
| Exd 34:20 | |
| | ששת ימים תעבד וביום השביעי תשבת בחריש ובקציר תשבת.
| Exd 34:21 | |
| | וחג שבעת תעשה לך בכורי קציר חטים וחג האסיף תקופת השנה.
| Exd 34:22 | |
| | שלש פעמים בשנה יראה כל-זכורך את-פני האדן יהוה אלהי ישראל.
| Exd 34:23 | |
| | כי-אוריש גוים מפניך והרחבתי את-גבלך ולא-יחמד איש את-ארצך בעלתך לראות את-פני יהוה אלהיך שלש פעמים בשנה.
| Exd 34:24 | |
| | לא-תשחט על-חמץ דם-זבחי ולא-ילין לבקר זבח חג הפסח.
| Exd 34:25 | |
| | ראשית בכורי אדמתך תביא בית יהוה אלהיך לא-תבשל גדי בחלב אמו.
| Exd 34:26 | |
| | ויאמר יהוה אל-משה כתב-לך את-הדברים האלה כי על-פי הדברים האלה כרתי אתך ברית ואת-ישראל.
| Exd 34:27 | |
| | ויהי-שם עם-יהוה ארבעים יום וארבעים לילה לחם לא אכל ומים לא שתה ויכתב על-הלחת את דברי הברית עשרת הדברים.
| Exd 34:28 | |
| | ויהי ברדת משה מהר סיני ושני לחת העדת ביד-משה ברדתו מן-ההר ומשה לא-ידע כי קרן עור פניו בדברו אתו.
| Exd 34:29 | |
| | וירא אהרן וכל-בני ישראל את-משה והנה קרן עור פניו וייראו מגשת אליו.
| Exd 34:30 | |
| | ויקרא אלהם משה וישבו אליו אהרן וכל-הנשאים בעדה וידבר משה אלהם.
| Exd 34:31 | |
| | ואחרי-כן נגשו כל-בני ישראל ויצום את כל-אשר דבר יהוה אתו בהר סיני.
| Exd 34:32 | |
| | ויכל משה מדבר אתם ויתן על-פניו מסוה.
| Exd 34:33 | |
| | ובבא משה לפני יהוה לדבר אתו יסיר את-המסוה עד-צאתו ויצא ודבר אל-בני ישראל את אשר יצוה.
| Exd 34:34 | |
| | וראו בני-ישראל את-פני משה כי קרן עור פני משה והשיב משה את- המסוה על-פניו עד-באו לדבר אתו.
| Exd 34:35 | |
