| |
Hebrew Old Testament |   | |
 |
| |
| | ומשה היה רעה את-צאן יתרו חתנו כהן מדין וינהג את-הצאן אחר המדבר ויבא אל-הר האלהים חרבה.
| Exd 3:1 | |
| | וירא מלאך יהוה אליו בלבת-אש מתוך הסנה וירא והנה הסנה בער באש והסנה איננו אכל.
| Exd 3:2 | |
| | ויאמר משה אסרה-נא ואראה את-המראה הגדל הזה מדוע לא-יבער הסנה.
| Exd 3:3 | |
| | וירא יהוה כי סר לראות ויקרא אליו אלהים מתוך הסנה ויאמר משה משה ויאמר הנני.
| Exd 3:4 | |
| | ויאמר אל-תקרב הלם של-נעליך מעל רגליך כי המקום אשר אתה עומד עליו אדמת-קדש הוא.
| Exd 3:5 | |
| | ויאמר אנכי אלהי אביך אלהי אברהם אלהי יצחק ואלהי יעקב ויסתר משה פניו כי ירא מהביט אל-האלהים.
| Exd 3:6 | |
| | ויאמר יהוה ראה ראיתי את-עני עמי אשר במצרים ואת-צעקתם שמעתי מפני נגשיו כי ידעתי את-מכאביו.
| Exd 3:7 | |
| | וארד להצילו מיד מצרים ולהעלתו מן-הארץ ההוא אל-ארץ טובה ורחבה אל-ארץ זבת חלב ודבש אל-מקום הכנעני והחתי והאמרי והפרזי והחוי והיבוסי.
| Exd 3:8 | |
| | ועתה הנה צעקת בני-ישראל באה אלי וגם-ראיתי את-הלחץ אשר מצרים לחצים אתם.
| Exd 3:9 | |
| | ועתה לכה ואשלחך אל-פרעה והוצא את-עמי בני-ישראל ממצרים.
| Exd 3:10 | |
| | ויאמר משה אל-האלהים מי אנכי כי אלך אל-פרעה וכי אוציא את-בני ישראל ממצרים.
| Exd 3:11 | |
| | ויאמר כי-אהיה עמך וזה-לך האות כי אנכי שלחתיך בהוציאך את-העם ממצרים תעבדון את-האלהים על ההר הזה.
| Exd 3:12 | |
| | ויאמר משה אל-האלהים הנה אנכי בא אל-בני ישראל ואמרתי להם אלהי אבותיכם שלחני אליכם ואמרו-לי מה-שמו מה אמר אלהם.
| Exd 3:13 | |
| | ויאמר אלהים אל-משה אהיה אשר אהיה ויאמר כה תאמר לבני ישראל אהיה שלחני אליכם.
| Exd 3:14 | |
| | ויאמר עוד אלהים אל-משה כה-תאמר אל-בני ישראל יהוה אלהי אבתיכם אלהי אברהם אלהי יצחק ואלהי יעקב שלחני אליכם זה-שמי לעלם וזה זכרי לדר דר.
| Exd 3:15 | |
| | לך ואספת את-זקני ישראל ואמרת אלהם יהוה אלהי אבתיכם נראה אלי אלהי אברהם יצחק ויעקב לאמר פקד פקדתי אתכם ואת-העשוי לכם במצרים.
| Exd 3:16 | |
| | ואמר אעלה אתכם מעני מצרים אל-ארץ הכנעני והחתי והאמרי והפרזי והחוי והיבוסי אל-ארץ זבת חלב ודבש.
| Exd 3:17 | |
| | ושמעו לקלך ובאת אתה וזקני ישראל אל-מלך מצרים ואמרתם אליו יהוה אלהי העבריים נקרה עלינו ועתה נלכה-נא דרך שלשת ימים במדבר ונזבחה ליהוה אלהינו.
| Exd 3:18 | |
| | ואני ידעתי כי לא-יתן אתכם מלך מצרים להלך ולא ביד חזקה.
| Exd 3:19 | |
| | ושלחתי את-ידי והכיתי את-מצרים בכל נפלאתי אשר אעשה בקרבו ואחרי-כן ישלח אתכם.
| Exd 3:20 | |
| | ונתתי את-חן העם-הזה בעיני מצרים והיה כי תלכון לא תלכו ריקם.
| Exd 3:21 | |
| | ושאלה אשה משכנתה ומגרת ביתה כלי-כסף וכלי זהב ושמלת ושמתם על- בניכם ועל-בנתיכם ונצלתם את-מצרים.
| Exd 3:22 | |
