| |
Hebrew Old Testament |   | |
 |
| |
| | ואתה הקרב אליך את-אהרן אחיך ואת-בניו אתו מתוך בני ישראל לכהנו- לי אהרן נדב ואביהוא אלעזר ואיתמר בני אהרן.
| Exd 28:1 | |
| | ועשית בגדי-קדש לאהרן אחיך לכבוד ולתפארת.
| Exd 28:2 | |
| | ואתה תדבר אל-כל-חכמי-לב אשר מלאתיו רוח חכמה ועשו את-בגדי אהרן לקדשו לכהנו-לי.
| Exd 28:3 | |
| | ואלה הבגדים אשר יעשו חשן ואפוד ומעיל וכתנת תשבץ מצנפת ואבנט ועשו בגדי-קדש לאהרן אחיך ולבניו לכהנו-לי.
| Exd 28:4 | |
| | והם יקחו את-הזהב ואת-התכלת ואת-הארגמן ואת-תולעת השני ואת-השש.
| Exd 28:5 | |
| | ועשו את-האפד זהב תכלת וארגמן תולעת שני ושש משזר מעשה חשב.
| Exd 28:6 | |
| | שתי כתפת חברת יהיה-לו אל-שני קצותיו וחבר.
| Exd 28:7 | |
| | וחשב אפדתו אשר עליו כמעשהו ממנו יהיה זהב תכלת וארגמן ותולעת שני ושש משזר.
| Exd 28:8 | |
| | ולקחת את-שתי אבני-שהם ופתחת עליהם שמות בני ישראל.
| Exd 28:9 | |
| | ששה משמתם על האבן האחת ואת-שמות הששה הנותרים על-האבן השנית כתולדתם.
| Exd 28:10 | |
| | מעשה חרש אבן פתוחי חתם תפתח את-שתי האבנים על-שמת בני ישראל מסבת משבצות זהב תעשה אתם.
| Exd 28:11 | |
| | ושמת את-שתי האבנים על כתפת האפד אבני זכרן לבני ישראל ונשא אהרן את-שמותם לפני יהוה על-שתי כתפיו לזכרן.
| Exd 28:12 | |
| | ועשית משבצת זהב.
| Exd 28:13 | |
| | ושתי שרשרת זהב טהור מגבלת תעשה אתם מעשה עבת ונתתה את-שרשרת העבתת על-המשבצת.
| Exd 28:14 | |
| | ועשית חשן משפט מעשה חשב כמעשה אפד תעשנו זהב תכלת וארגמן ותולעת שני ושש משזר תעשה אתו.
| Exd 28:15 | |
| | רבוע יהיה כפול זרת ארכו וזרת רחבו.
| Exd 28:16 | |
| | ומלאת בו מלאת אבן ארבעה טורים אבן טור אדם פטדה וברקת הטור האחד.
| Exd 28:17 | |
| | והטור השני נפך ספיר ויהלם.
| Exd 28:18 | |
| | והטור השלישי לשם שבו ואחלמה.
| Exd 28:19 | |
| | והטור הרביעי תרשיש ושהם וישפה משבצים זהב יהיו במלואתם.
| Exd 28:20 | |
| | והאבנים תהיין על-שמת בני-ישראל שתים עשרה על-שמתם פתוחי חותם איש על-שמו תהיין לשני עשר שבט.
| Exd 28:21 | |
| | ועשית על-החשן שרשת גבלת מעשה עבת זהב טהור.
| Exd 28:22 | |
| | ועשית על-החשן שתי טבעות זהב ונתת את-שתי הטבעות על-שני קצות החשן.
| Exd 28:23 | |
| | ונתתה את-שתי עבתת הזהב על-שתי הטבעת אל-קצות החשן.
| Exd 28:24 | |
| | ואת שתי קצות שתי העבתת תתן על-שתי המשבצות ונתתה על-כתפות האפד אל-מול פניו.
| Exd 28:25 | |
| | ועשית שתי טבעות זהב ושמת אתם על-שני קצות החשן על-שפתו אשר אל- עבר האפוד ביתה.
| Exd 28:26 | |
| | ועשית שתי טבעות זהב ונתתה אתם על-שתי כתפות האפוד מלמטה ממול פניו לעמת מחברתו ממעל לחשב האפוד.
| Exd 28:27 | |
| | וירכסו את-החשן מטבעתו אל-טבעת האפוד בפתיל תכלת להיות על-חשב האפוד ולא-יזח החשן מעל האפוד.
| Exd 28:28 | |
| | ונשא אהרן את-שמות בני-ישראל בחשן המשפט על-לבו בבאו אל-הקדש לזכרן לפני-יהוה תמיד.
| Exd 28:29 | |
| | ונתת אל-חשן המשפט את-האורים ואת-התמים והיו על-לב אהרן בבאו לפני יהוה ונשא אהרן את-משפט בני-ישראל על-לבו לפני יהוה תמיד.
| Exd 28:30 | |
| | ועשית את-מעיל האפוד כליל תכלת.
| Exd 28:31 | |
| | והיה פי-ראשו בתוכו שפה יהיה לפיו סביב מעשה ארג כפי תחרא יהיה- לו לא יקרע.
| Exd 28:32 | |
| | ועשית על-שוליו רמני תכלת וארגמן ותולעת שני על-שוליו סביב ופעמני זהב בתוכם סביב.
| Exd 28:33 | |
| | פעמן זהב ורמון פעמן זהב ורמון על-שולי המעיל סביב.
| Exd 28:34 | |
| | והיה על-אהרן לשרת ונשמע קולו בבאו אל-הקדש לפני יהוה ובצאתו ולא ימות.
| Exd 28:35 | |
| | ועשית ציץ זהב טהור ופתחת עליו פתוחי חתם קדש ליהוה.
| Exd 28:36 | |
| | ושמת אתו על-פתיל תכלת והיה על-המצנפת אל-מול פני-המצנפת יהיה.
| Exd 28:37 | |
| | והיה על-מצח אהרן ונשא אהרן את-עון הקדשים אשר יקדישו בני ישראל לכל-מתנת קדשיהם והיה על-מצחו תמיד לרצון להם לפני יהוה.
| Exd 28:38 | |
| | ושבצת הכתנת שש ועשית מצנפת שש ואבנט תעשה מעשה רקם.
| Exd 28:39 | |
| | ולבני אהרן תעשה כתנת ועשית להם אבנטים ומגבעות תעשה להם לכבוד ולתפארת.
| Exd 28:40 | |
| | והלבשת אתם את-אהרן אחיך ואת-בניו אתו ומשחת אתם ומלאת את-ידם וקדשת אתם וכהנו לי.
| Exd 28:41 | |
| | ועשה להם מכנסי-בד לכסות בשר ערוה ממתנים ועד-ירכים יהיו.
| Exd 28:42 | |
| | והיו על-אהרן ועל-בניו בבאם אל-אהל מועד או בגשתם אל-המזבח לשרת בקדש ולא-ישאו עון ומתו חקת עולם לו ולזרעו אחריו.
| Exd 28:43 | |
