| |
Hebrew Old Testament |   | |
 |
| |
| | ועשית את-המזבח עצי שטים חמש אמות ארך וחמש אמות רחב רבוע יהיה המזבח ושלש אמות קמתו.
| Exd 27:1 | |
| | ועשית קרנתיו על ארבע פנתיו ממנו תהיין קרנתיו וצפית אתו נחשת.
| Exd 27:2 | |
| | ועשית סירתיו לדשנו ויעיו ומזרקתיו ומזלגתיו ומחתתיו לכל-כליו תעשה נחשת.
| Exd 27:3 | |
| | ועשית לו מכבר מעשה רשת נחשת ועשית על-הרשת ארבע טבעת נחשת על ארבע קצותיו.
| Exd 27:4 | |
| | ונתתה אתה תחת כרכב המזבח מלמטה והיתה הרשת עד חצי המזבח.
| Exd 27:5 | |
| | ועשית בדים למזבח בדי עצי שטים וצפית אתם נחשת.
| Exd 27:6 | |
| | והובא את-בדיו בטבעת והיו הבדים על-שתי צלעת המזבח בשאת אתו.
| Exd 27:7 | |
| | נבוב לחת תעשה אתו כאשר הראה אתך בהר כן יעשו.
| Exd 27:8 | |
| | ועשית את חצר המשכן לפאת נגב-תימנה קלעים לחצר שש משזר מאה באמה ארך לפאה האחת.
| Exd 27:9 | |
| | ועמדיו עשרים ואדניהם עשרים נחשת ווי העמדים וחשקיהם כסף.
| Exd 27:10 | |
| | וכן לפאת צפון בארך קלעים מאה ארך ועמדו עשרים ואדניהם עשרים נחשת ווי העמדים וחשקיהם כסף.
| Exd 27:11 | |
| | ורחב החצר לפאת-ים קלעים חמשים אמה עמדיהם עשרה ואדניהם עשרה.
| Exd 27:12 | |
| | ורחב החצר לפאת קדמה מזרחה חמשים אמה.
| Exd 27:13 | |
| | וחמש עשרה אמה קלעים לכתף עמדיהם שלשה ואדניהם שלשה.
| Exd 27:14 | |
| | ולכתף השנית חמש עשרה קלעים עמדיהם שלשה ואדניהם שלשה.
| Exd 27:15 | |
| | ולשער החצר מסך עשרים אמה תכלת וארגמן ותולעת שני ושש משזר מעשה רקם עמדיהם ארבעה ואדניהם ארבעה.
| Exd 27:16 | |
| | כל-עמודי החצר סביב מחשקים כסף וויהם כסף ואדניהם נחשת.
| Exd 27:17 | |
| | ארך החצר מאה באמה ורחב חמשים בחמשים וקמה חמש אמות שש משזר ואדניהם נחשת.
| Exd 27:18 | |
| | לכל כלי המשכן בכל עבדתו וכל-יתדתיו וכל-יתדת החצר נחשת.
| Exd 27:19 | |
| | ואתה תצוה את-בני ישראל ויקחו אליך שמן זית זך כתית למאור להעלת נר תמיד.
| Exd 27:20 | |
| | באהל מועד מחוץ לפרכת אשר על-העדת יערך אתו אהרן ובניו מערב עד- בקר לפני יהוה חקת עולם לדרתם מאת בני ישראל.
| Exd 27:21 | |
