| |
Hebrew Old Testament |   | |
 |
| |
| | ואל-משה אמר עלה אל-יהוה אתה ואהרן נדב ואביהוא ושבעים מזקני ישראל והשתחויתם מרחק.
| Exd 24:1 | |
| | ונגש משה לבדו אל-יהוה והם לא יגשו והעם לא יעלו עמו.
| Exd 24:2 | |
| | ויבא משה ויספר לעם את כל-דברי יהוה ואת כל-המשפטים ויען כל-העם קול אחד ויאמרו כל-הדברים אשר-דבר יהוה נעשה.
| Exd 24:3 | |
| | ויכתב משה את כל-דברי יהוה וישכם בבקר ויבן מזבח תחת ההר ושתים עשרה מצבה לשנים עשר שבטי ישראל.
| Exd 24:4 | |
| | וישלח את-נערי בני ישראל ויעלו עלת ויזבחו זבחים שלמים ליהוה פרים.
| Exd 24:5 | |
| | ויקח משה חצי הדם וישם באגנת וחצי הדם זרק על-המזבח.
| Exd 24:6 | |
| | ויקח ספר הברית ויקרא באזני העם ויאמרו כל אשר-דבר יהוה נעשה ונשמע.
| Exd 24:7 | |
| | ויקח משה את-הדם ויזרק על-העם ויאמר הנה דם-הברית אשר כרת יהוה עמכם על כל-הדברים האלה.
| Exd 24:8 | |
| | ויעל משה ואהרן נדב ואביהוא ושבעים מזקני ישראל.
| Exd 24:9 | |
| | ויראו את אלהי ישראל ותחת רגליו כמעשה לבנת הספיר וכעצם השמים לטהר.
| Exd 24:10 | |
| | ואל-אצילי בני ישראל לא שלח ידו ויחזו את-האלהים ויאכלו וישתו.
| Exd 24:11 | |
| | ויאמר יהוה אל-משה עלה אלי ההרה והיה-שם ואתנה לך את-לחת האבן והתורה והמצוה אשר כתבתי להורתם.
| Exd 24:12 | |
| | ויקם משה ויהושע משרתו ויעל משה אל-הר האלהים.
| Exd 24:13 | |
| | ואל-הזקנים אמר שבו-לנו בזה עד אשר-נשוב אליכם והנה אהרן וחור עמכם מי-בעל דברים יגש אלהם.
| Exd 24:14 | |
| | ויעל משה אל-ההר ויכס הענן את-ההר.
| Exd 24:15 | |
| | וישכן כבוד-יהוה על-הר סיני ויכסהו הענן ששת ימים ויקרא אל-משה ביום השביעי מתוך הענן.
| Exd 24:16 | |
| | ומראה כבוד יהוה כאש אכלת בראש ההר לעיני בני ישראל.
| Exd 24:17 | |
| | ויבא משה בתוך הענן ויעל אל-ההר ויהי משה בהר ארבעים יום וארבעים לילה.
| Exd 24:18 | |
