| |
Hebrew Old Testament |   | |
 |
| |
| | בחדש השלישי לצאת בני-ישראל מארץ מצרים ביום הזה באו מדבר סיני.
| Exd 19:1 | |
| | ויסעו מרפידים ויבאו מדבר סיני ויחנו במדבר ויחן-שם ישראל נגד ההר.
| Exd 19:2 | |
| | ומשה עלה אל-האלהים ויקרא אליו יהוה מן-ההר לאמר כה תאמר לבית יעקב ותגיד לבני ישראל.
| Exd 19:3 | |
| | אתם ראיתם אשר עשיתי למצרים ואשא אתכם על-כנפי נשרים ואבא אתכם אלי.
| Exd 19:4 | |
| | ועתה אם-שמוע תשמעו בקלי ושמרתם את-בריתי והייתם לי סגלה מכל- העמים כי-לי כל-הארץ.
| Exd 19:5 | |
| | ואתם תהיו-לי ממלכת כהנים וגוי קדוש אלה הדברים אשר תדבר אל-בני ישראל.
| Exd 19:6 | |
| | ויבא משה ויקרא לזקני העם וישם לפניהם את כל-הדברים האלה אשר צוהו יהוה.
| Exd 19:7 | |
| | ויענו כל-העם יחדו ויאמרו כל אשר-דבר יהוה נעשה וישב משה את- דברי העם אל-יהוה.
| Exd 19:8 | |
| | ויאמר יהוה אל-משה הנה אנכי בא אליך בעב הענן בעבור ישמע העם בדברי עמך וגם-בך יאמינו לעולם ויגד משה את-דברי העם אל-יהוה.
| Exd 19:9 | |
| | ויאמר יהוה אל-משה לך אל-העם וקדשתם היום ומחר וכבסו שמלתם.
| Exd 19:10 | |
| | והיו נכנים ליום השלישי כי ביום השלשי ירד יהוה לעיני כל-העם על-הר סיני.
| Exd 19:11 | |
| | והגבלת את-העם סביב לאמר השמרו לכם עלות בהר ונגע בקצהו כל- הנגע בהר מות יומת.
| Exd 19:12 | |
| | לא-תגע בו יד כי-סקול יסקל או-ירה יירה אם-בהמה אם-איש לא יחיה במשך היבל המה יעלו בהר.
| Exd 19:13 | |
| | וירד משה מן-ההר אל-העם ויקדש את-העם ויכבסו שמלתם.
| Exd 19:14 | |
| | ויאמר אל-העם היו נכנים לשלשת ימים אל-תגשו אל-אשה.
| Exd 19:15 | |
| | ויהי ביום השלישי בהית הבקר ויהי קלת וברקים וענן כבד על-ההר וקל שפר חזק מאד ויחרד כל-העם אשר במחנה.
| Exd 19:16 | |
| | ויוצא משה את-העם לקראת האלהים מן-המחנה ויתיצבו בתחתית ההר.
| Exd 19:17 | |
| | והר סיני עשן כלו מפני אשר ירד עליו יהוה באש ויעל עשנו כעשן הכבשן ויחרד כל-ההר מאד.
| Exd 19:18 | |
| | ויהי קול השפר הולך וחזק מאד משה ידבר והאלהים יעננו בקול.
| Exd 19:19 | |
| | וירד יהוה על-הר סיני אל-ראש ההר ויקרא יהוה למשה אל-ראש ההר ויעל משה.
| Exd 19:20 | |
| | ויאמר יהוה אל-משה רד העד בעם פן-יהרסו אל-יהוה לראות ונפל ממנו רב.
| Exd 19:21 | |
| | וגם הכהנים הנגשים אל-יהוה יתקדשו פן-יפרץ בהם יהוה.
| Exd 19:22 | |
| | ויאמר משה אל-יהוה לא-יוכל העם לעלת אל-הר סיני כי-אתה העדתה בנו לאמר הגבל את-ההר וקדשתו.
| Exd 19:23 | |
| | ויאמר אליו יהוה לך-רד ועלית אתה ואהרן עמך והכהנים והעם אל- יהרסו לעלת אל-יהוה פן-יפרץ-בם.
| Exd 19:24 | |
| | וירד משה אל-העם ויאמר אלהם.
| Exd 19:25 | |
