| |
Hebrew Old Testament |   | |
 |
| |
| | ויסעו מאילם ויבאו כל-עדת בני-ישראל אל-מדבר-סין אשר בין-אילם ובין סיני בחמשה עשר יום לחדש השני לצאתם מארץ מצרים.
| Exd 16:1 | |
| | וילינו כל-עדת בני-ישראל על-משה ועל-אהרן במדבר.
| Exd 16:2 | |
| | ויאמרו אלהם בני ישראל מי-יתן מותנו ביד-יהוה בארץ מצרים בשבתנו על-סיר הבשר באכלנו לחם לשבע כי-הוצאתם אתנו אל-המדבר הזה להמית את-כל-הקהל הזה ברעב.
| Exd 16:3 | |
| | ויאמר יהוה אל-משה הנני ממטיר לכם לחם מן-השמים ויצא העם ולקטו דבר-יום ביומו למען אנסנו הילך בתורתי אם-לא.
| Exd 16:4 | |
| | והיה ביום הששי והכינו את אשר-יביאו והיה משנה על אשר-ילקטו יום יום.
| Exd 16:5 | |
| | ויאמר משה ואהרן אל-כל-בני ישראל ערב וידעתם כי יהוה הוציא אתכם מארץ מצרים.
| Exd 16:6 | |
| | ובקר וראיתם את-כבוד יהוה בשמעו את-תלנתיכם על-יהוה ונחנו מה כי תלונו עלינו.
| Exd 16:7 | |
| | ויאמר משה בתת יהוה לכם בערב בשר לאכל ולחם בבקר לשבע בשמע יהוה את-תלנתיכם אשר-אתם מלינם עליו ונחנו מה לא-עלינו תלנתיכם כי על- יהוה.
| Exd 16:8 | |
| | ויאמר משה אל-אהרן אמר אל-כל-עדת בני ישראל קרבו לפני יהוה כי שמע את תלנתיכם.
| Exd 16:9 | |
| | ויהי כדבר אהרן אל-כל-עדת בני-ישראל ויפנו אל-המדבר והנה כבוד יהוה נראה בענן.
| Exd 16:10 | |
| | וידבר יהוה אל-משה לאמר.
| Exd 16:11 | |
| | שמעתי את-תלונת בני ישראל דבר אלהם לאמר בין הערבים תאכלו בשר ובבקר תשבעו-לחם וידעתם כי אני יהוה אלהיכם.
| Exd 16:12 | |
| | ויהי בערב ותעל השלו ותכס את-המחנה ובבקר היתה שכבת הטל סביב למחנה.
| Exd 16:13 | |
| | ותעל שכבת הטל והנה על-פני המדבר דק מחספס דק ככפר על-הארץ.
| Exd 16:14 | |
| | ויראו בני-ישראל ויאמרו איש אל-אחיו מן הוא כי לא ידעו מה-הוא ויאמר משה אלהם הוא הלחם אשר נתן יהוה לכם לאכלה.
| Exd 16:15 | |
| | זה הדבר אשר צוה יהוה לקטו ממנו איש לפי אכלו עמר לגלגלת מספר נפשתיכם איש לאשר באהלו תקחו.
| Exd 16:16 | |
| | ויעשו-כן בני ישראל וילקטו המרבה והממעיט.
| Exd 16:17 | |
| | וימדו בעמר ולא העדיף המרבה והממעיט לא החסיר איש לפי-אכלו lwhe.
| Exd 16:18 | |
| | ויאמר משה אלהם איש אל-יותר ממנו עד-בקר.
| Exd 16:19 | |
| | ולא-שמעו אל-משה ויותרו אנשים ממנו עד-בקר וירם תולעים ויבאש ויקצף עלהם משה.
| Exd 16:20 | |
| | וילקטו אתו בבקר בבקר איש כפי אכלו וחם השמש ונמס.
| Exd 16:21 | |
| | ויהי ביום הששי לקטו לחם משנה שני העמר לאחד ויבאו כל-נשיאי העדה ויגידו למשה.
| Exd 16:22 | |
| | ויאמר אלהם הוא אשר דבר יהוה שבתון שבת-קדש ליהוה מחר את אשר- תאפו אפו ואת אשר-תבשלו בשלו ואת כל-העדף הניחו לכם למשמרת עד- הבקר.
| Exd 16:23 | |
| | ויניחו אתו עד-הבקר כאשר צוה משה ולא הבאיש ורמה לא-היתה בו.
| Exd 16:24 | |
| | ויאמר משה אכלהו היום כי-שבת היום ליהוה היום לא תמצאהו בשדה.
| Exd 16:25 | |
| | ששת ימים תלקטהו וביום השביעי שבת לא יהיה-בו.
| Exd 16:26 | |
| | ויהי ביום השביעי יצאו מן-העם ללקט ולא מצאו.
| Exd 16:27 | |
| | ויאמר יהוה אל-משה עד-אנה מאנתם לשמר מצותי ותורתי.
| Exd 16:28 | |
| | ראו כי-יהוה נתן לכם השבת על-כן הוא נתן לכם ביום הששי לחם יומים שבו איש תחתיו אל-יצא איש ממקמו ביום השביעי.
| Exd 16:29 | |
| | וישבתו העם ביום השבעי.
| Exd 16:30 | |
| | ויקראו בית-ישראל את-שמו מן והוא כזרע גד לבן וטעמו כצפיחת בדבש.
| Exd 16:31 | |
| | ויאמר משה זה הדבר אשר צוה יהוה מלא העמר ממנו למשמרת לדרתיכם למען יראו את-הלחם אשר האכלתי אתכם במדבר בהוציאי אתכם מארץ מצרים.
| Exd 16:32 | |
| | ויאמר משה אל-אהרן קח צנצנת אחת ותן-שמה מלא-העמר מן והנח אתו לפני יהוה למשמרת לדרתיכם.
| Exd 16:33 | |
| | כאשר צוה יהוה אל-משה ויניחהו אהרן לפני העדת למשמרת.
| Exd 16:34 | |
| | ובני ישראל אכלו את-המן ארבעים שנה עד-באם אל-ארץ נושבת את-המן אכלו עד-באם אל-קצה ארץ כנען.
| Exd 16:35 | |
| | והעמר עשרית האיפה הוא.
| Exd 16:36 | |
