| |
Hebrew Old Testament |   | |
 |
| |
| | וידבר יהוה אל-משה לאמר.
| Exd 13:1 | |
| | קדש-לי כל-בכור פטר כל-רחם בבני ישראל באדם ובבהמה לי הוא.
| Exd 13:2 | |
| | ויאמר משה אל-העם זכור את-היום הזה אשר יצאתם ממצרים מבית עבדים כי בחזק יד הוציא יהוה אתכם מזה ולא יאכל חמץ.
| Exd 13:3 | |
| | היום אתם יצאים בחדש האביב.
| Exd 13:4 | |
| | והיה כי-יביאך יהוה אל-ארץ הכנעני והחתי והאמרי והחוי והיבוסי אשר נשבע לאבתיך לתת לך ארץ זבת חלב ודבש ועבדת את-העבדה הזאת בחדש הזה.
| Exd 13:5 | |
| | שבעת ימים תאכל מצת וביום השביעי חג ליהוה.
| Exd 13:6 | |
| | מצות יאכל את שבעת הימים ולא-יראה לך חמץ ולא-יראה לך שאר בכל- גבלך.
| Exd 13:7 | |
| | והגדת לבנך ביום ההוא לאמר בעבור זה עשה יהוה לי בצאתי ממצרים.
| Exd 13:8 | |
| | והיה לך לאות על-ידך ולזכרון בין עיניך למען תהיה תורת יהוה בפיך כי ביד חזקה הוצאך יהוה ממצרים.
| Exd 13:9 | |
| | ושמרת את-החקה הזאת למועדה מימים ימימה.
| Exd 13:10 | |
| | והיה כי-יבאך יהוה אל-ארץ הכנעני כאשר נשבע לך ולאבתיך ונתנה לך.
| Exd 13:11 | |
| | והעברת כל-פטר-רחם ליהוה וכל-פטר שגר בהמה אשר יהיה לך הזכרים ליהוה.
| Exd 13:12 | |
| | וכל-פטר חמר תפדה בשה ואם-לא תפדה וערפתו וכל בכור אדם בבניך תפדה.
| Exd 13:13 | |
| | והיה כי-ישאלך בנך מחר לאמר מה-זאת ואמרת אליו בחזק יד הוציאנו יהוה ממצרים מבית עבדים.
| Exd 13:14 | |
| | ויהי כי-הקשה פרעה לשלחנו ויהרג יהוה כל-בכור בארץ מצרים מבכר אדם ועד-בכור בהמה על-כן אני זבח ליהוה כל-פטר רחם הזכרים וכל- בכור בני אפדה.
| Exd 13:15 | |
| | והיה לאות על-ידכה ולטוטפת בין עיניך כי בחזק יד הוציאנו יהוה ממצרים.
| Exd 13:16 | |
| | ויהי בשלח פרעה את-העם ולא-נחם אלהים דרך ארץ פלשתים כי קרוב הוא כי אמר אלהים פן-ינחם העם בראתם מלחמה ושבו מצרימה.
| Exd 13:17 | |
| | ויסב אלהים את-העם דרך המדבר ים-סוף וחמשים עלו בני-ישראל מארץ מצרים.
| Exd 13:18 | |
| | ויקח משה את-עצמות יוסף עמו כי השבע השביע את-בני ישראל לאמר פקד יפקד אלהים אתכם והעליתם את-עצמתי מזה אתכם.
| Exd 13:19 | |
| | ויסעו מסכת ויחנו באתם בקצה המדבר.
| Exd 13:20 | |
| | ויהוה הלך לפניהם יומם בעמוד ענן לנחתם הדרך ולילה בעמוד אש להאיר להם ללכת יומם ולילה.
| Exd 13:21 | |
| | לא-ימיש עמוד הענן יומם ועמוד האש לילה לפני העם.
| Exd 13:22 | |
