| |
Hebrew Old Testament |   | |
 |
| |
| | ויאמר יהוה אל-משה עוד נגע אחד אביא על-פרעה ועל-מצרים אחרי-כן ישלח אתכם מזה כשלחו כלה גרש יגרש אתכם מזה.
| Exd 11:1 | |
| | דבר-נא באזני העם וישאלו איש מאת רעהו ואשה מאת רעותה כלי-כסף וכלי זהב.
| Exd 11:2 | |
| | ויתן יהוה את-חן העם בעיני מצרים גם האיש משה גדול מאד בארץ מצרים בעיני עבדי-פרעה ובעיני העם.
| Exd 11:3 | |
| | ויאמר משה כה אמר יהוה כחצת הלילה אני יוצא בתוך מצרים.
| Exd 11:4 | |
| | ומת כל-בכור בארץ מצרים מבכור פרעה הישב על-כסאו עד בכור השפחה אשר אחר הרחים וכל בכור בהמה.
| Exd 11:5 | |
| | והיתה צעקה גדלה בכל-ארץ מצרים אשר כמהו לא נהיתה וכמהו לא תסף.
| Exd 11:6 | |
| | ולכל בני ישראל לא יחרץ-כלב לשנו למאיש ועד-בהמה למען תדעון אשר יפלה יהוה בין מצרים ובין ישראל.
| Exd 11:7 | |
| | וירדו כל-עבדיך אלה אלי והשתחוו-לי לאמר צא אתה וכל-העם אשר- ברגליך ואחרי-כן אצא ויצא מעם-פרעה בחרי-אף.
| Exd 11:8 | |
| | ויאמר יהוה אל-משה לא-ישמע אליכם פרעה למען רבות מופתי בארץ מצרים.
| Exd 11:9 | |
| | ומשה ואהרן עשו את-כל-המפתים האלה לפני פרעה ויחזק יהוה את-לב פרעה ולא-שלח את-בני-ישראל מארצו.
| Exd 11:10 | |
