| |
Hebrew Old Testament |   | |
 |
| |
| | והתנבי חגי נביאה וזכריה בר-עדוא נביאיא על-יהודיא די ביהוד ובירושלם בשם אלה ישראל עליהון.
| Ezr 5:1 | |
| | באדין קמו זרבבל בר-שאלתיאל וישוע בר-יוצדק ושריו למבנא בית אלהא די בירושלם ועמהון נביאיא די-אלהא מסעדין להון.
| Ezr 5:2 | |
| | בה-זמנא אתא עליהון תתני פחת עבר-נהרה ושתר בוזני וכנותהון וכן אמרין להם מן-שם לכם טעם ביתא דנה לבנא ואשרנא דנה לשכללה.
| Ezr 5:3 | |
| | אדין כנמא אמרנא להם מן-אנון שמהת גבריא די-דנה בנינא בנין.
| Ezr 5:4 | |
| | ועין אלההם הות על-שבי יהודיא ולא-בטלו המו עד-טעמא לדריוש יהך ואדין יתיבון נשתונא על-דנה.
| Ezr 5:5 | |
| | פרשגן אגרתא די-שלח תתני פחת עבר-נהרה ושתר בוזני וכנותה אפרסכיא די בעבר נהרה על-דריוש מלכא.
| Ezr 5:6 | |
| | פתגמא שלחו עלוהי וכדנה כתיב בגוה לדריוש מלכא שלמא כלא.
| Ezr 5:7 | |
| | ידיע להוא למלכא די-אזלנא ליהוד מדינתא לבית אלהא רבא והוא מתבנא אבן גלל ואע מתשם בכתליא ועבידתא דך אספרנא מתעבדא ומצלח בידהם.
| Ezr 5:8 | |
| | אדין שאלנא לשביא אלך כנמא אמרנא להם מן-שם לכם טעם ביתא דנה למבניה ואשרנא דנה לשכללה.
| Ezr 5:9 | |
| | ואף שמהתהם שאלנא להם להודעותך די נכתב שם-גבריא די בראשיהם.
| Ezr 5:10 | |
| | וכנמא פתגמא התיבונא לממר אנחנא המו עבדוהי די-אלה שמיא וארעא ובנין ביתא די-הוא בנה מקדמת דנה שנין שגיאן ומלך לישראל רב בנהי ושכללה.
| Ezr 5:11 | |
| | להן מן-די הרגזו אבהתנא לאלה שמיא יהב המו ביד נבוכדנצר מלך- בבל כסדיא וביתה דנה סתרה ועמה הגלי לבבל.
| Ezr 5:12 | |
| | ברם בשנת חדה לכורש מלכא די בבל כורש מלכא שם טעם בית-אלהא דנה לבנא.
| Ezr 5:13 | |
| | ואף מאניא די-בית-אלהא די דהבה וכספא די נבוכדנצר הנפק מן- היכלא די בירושלם והיבל המו להיכלא די בבל הנפק המו כורש מלכא מן- היכלא די בבל ויהיבו לששבצר שמה די פחה שמה.
| Ezr 5:14 | |
| | ואמר-לה אלה מאניא שא אזל-אחת המו בהיכלא די בירושלם ובית אלהא יתבנא על-אתרה.
| Ezr 5:15 | |
| | אדין ששבצר דך אתא יהב אשיא די-בית אלהא די בירושלם ומן-אדין ועד-כען מתבנא ולא שלם.
| Ezr 5:16 | |
| | וכען הן על-מלכא טב יתבקר בבית גנזיא די-מלכא תמה די בבבל הן איתי די-מן-כורש מלכא שים טעם למבנא בית-אלהא דך בירושלם ורעות מלכא על-דנה ישלח עלינא.
| Ezr 5:17 | |
