| |
Afrikaanse Bybel |   | |
 |
| |
| | Pro 11:1 | 'n Valse weegskaal is vir die HERE 'n gruwel, maar in 'n volle gewig het Hy behae.
| |
| | Pro 11:2 | Kom die vermetelheid, dan kom die skande, maar by die beskeidenes is wysheid.
| |
| | Pro 11:3 | Die regskapenheid van die opregtes is vir hulle 'n leier, maar die valsheid van die ontroues vernietig hulle.
| |
| | Pro 11:4 | Goed bring geen voordeel op die dag van die grimmigheid nie, maar geregtigheid red van die dood.
| |
| | Pro 11:5 | Die geregtigheid van die regskapene maak sy weg gelyk, maar die goddelose val deur sy goddeloosheid.
| |
| | Pro 11:6 | Die geregtigheid van die opregtes red hulle, maar deur hulle eie begeerlikheid word die ontroues gevang.
| |
| | Pro 11:7 | By die dood van 'n goddelose mens gaan sy hoop tot niet, en die verwagting van die roekelose het vergaan.
| |
| | Pro 11:8 | Word die regverdige uit die benoudheid gered, dan kom die goddelose in sy plek.
| |
| | Pro 11:9 | Deur die mond stort die roekelose sy naaste in die verderf, maar deur kennis word die regverdiges gered.
| |
| | Pro 11:10 | Oor die voorspoed van die regverdiges jubel 'n stad, en as die goddelose omkom, is daar gejubel.
| |
| | Pro 11:11 | Deur die seën van die opregtes kom 'n stad op, maar deur die mond van die goddelose word dit afgebreek.
| |
| | Pro 11:12 | Die verstandelose verag sy naaste, maar 'n verstandige man bly stil.
| |
| | Pro 11:13 | Die wat met kwaadsprekery omgaan, maak 'n geheim openbaar, maar hy wat betroubaar is van gees, bedek 'n saak.
| |
| | Pro 11:14 | As daar nie goeie oorleg is nie, val 'n volk; maar in die veelheid van raadgewers is redding.
| |
| | Pro 11:15 | Baie sleg word iemand behandel as hy vir 'n ander borg gestaan het; maar hy wat haat wie die handslag gee, is veilig.
| |
| | Pro 11:16 | 'n Aanvallige vrou verkry eer, en die geweldenaars verkry rykdom.
| |
| | Pro 11:17 | 'n Man wat 'n weldaad bewys, doen goed aan sy eie siel, maar 'n wreedaard pynig sy eie vlees.
| |
| | Pro 11:18 | Die goddelose behaal oneerlike wins, maar hy wat geregtigheid saai, 'n betroubare loon.
| |
| | Pro 11:19 | Ware geregtigheid lei tot die lewe, maar hy wat die kwaad najaag, jaag na sy dood.
| |
| | Pro 11:20 | Die wat verkeerd van hart is, is vir die HERE 'n gruwel; maar Hy het behae in die wat regskape van wandel is.
| |
| | Pro 11:21 | Sekerlik, die slegte bly nie ongestraf nie; maar die geslag van regverdiges raak vry.
| |
| | Pro 11:22 | 'n Goue ring in 'n vark se snuit, so is 'n vrou wat mooi is maar sonder beleid.
| |
| | Pro 11:23 | Die begeerte van die regverdiges is net ten goede, maar die hoop van die goddelose is 'n strafgerig van toorn.
| |
| | Pro 11:24 | Daar is een wat ruim uitdeel en nog meer kry, en een wat terughou meer as wat reg is, maar tot sy gebrek.
| |
| | Pro 11:25 | Die siel wat seën, word versadig; en hy wat laaf, word self ook gelaaf.
| |
| | Pro 11:26 | Hy wat koring terughou, hom vloek die mense; maar seëning kom op die hoof van hom wat koring verkoop.
| |
| | Pro 11:27 | Wie die goeie nastreef, soek wat welgevallig is; maar hy wat die kwaad soek, oor hom sal dit kom.
| |
| | Pro 11:28 | Wie op sy rykdom vertrou, dié sal val; maar die regverdiges sal soos blare uitspruit.
| |
| | Pro 11:29 | Wie sy huis in beroering bring, sal wind erwe, en 'n dwaas word 'n slaaf van hom wat wys van hart is.
| |
| | Pro 11:30 | Die vrug van die regverdige is 'n boom van die lewe, en hy wat siele win, is wys.
| |
| | Pro 11:31 | As die regverdige op aarde vergelding ontvang, hoeveel te meer die goddelose en die sondaar!
| |
